Wednesday, March 26, 2014

ആറങ്ങോട്ട് സ്വരൂപം

കൊങ്ങന്‍പ്പടയുടെ ആക്രമണം

തമിഴ് നാട്ടില്‍ നിന്ന് പലക്കാലങ്ങളിലായി പാലക്കാട് തുറസ്സിലൂടെ ചോളന്‍മാരുടെയും പാണ്ഢ്യന്‍മാരുടെയും സൈന്യങ്ങള്‍ കേരളത്തിലേക്ക് അധിക്രമിച്ച് കടന്നിട്ടുണ്ട്.ഈ കൊങ്ങന്‍ ആക്രമണം തുരത്താന്‍ സാമൂതിരിയും വള്ളുവക്കോനാതിരിയും കേരളത്തിലെ മറ്റ് നാടുവാഴികളും സംയുക്തമായി പ്രവര്‍ത്തിച്ചിട്ടുണ്ട്.

പരദേശിസേനയെ തുരത്തുന്നതില്‍ പലപ്പോഴും അവര്‍ വിജയിച്ചു.പക്ഷേ അതിന്റെ അനന്തരഫലം വള്ളുവക്കോനാതിരിയെ പ്രതികൂലമായി ബാധിച്ചു.വള്ളുവക്കോനാതിരിക്ക് പല പ്രധാന സ്ഥലങ്ങളും നഷ്ടപ്പെട്ടു.സാമൂതിരി അവകയ്യടക്കുകയാണ് ഉണ്ടായത്.രണ്ട് സ്വരൂപങ്ങളും തമ്മിലുള്ള മത്സരം ഇതോടെ രൂക്ഷമായി.അതിന്റെ പ്രത്യക്ഷഫലമാണ് തിരുനാവായയില്‍ നടന്നിരുന്ന മാമാങ്കത്തില്‍ പ്രകടമായത്.

വള്ളുവക്കോനാതിരിയില്‍ നിന്ന് മാമാങ്കത്തിന്റെ അദ്ധ്യക്ഷസ്ഥാനം സാമൂതിരി പിടിച്ചെടുത്തു. ഈ കാര്യത്തില്‍ മുസ്ലീംങ്ങളുടെ സഹായം സാമൂതിരിക്ക് ലഭിച്ചിരുന്നു.പിന്നീട് വള്ളുവക്കോനാതിരിയുടെ ശക്തി ക്രമേണകുറയുന്നതായിട്ടാണ് നാം കാണുന്നത്.

കൂറുമാറ്റം
ഈ സ്വരൂപത്തിന്റെ പലമന്ത്രിമാരും പടനായകന്‍മാരും പലരും പിന്നീട് സാമൂതിരി പക്ഷത്തുചേര്‍ന്നു.മണ്ണാര്‍ക്കാട് നായര്‍,കോങ്ങാട്ടുനായര്‍ തുടങ്ങിയവര്‍ കൂറുമാറ്റം നടത്തിയ സേനാനായകരില്‍പ്പെടുന്നു.മങ്കടയുടെ സമീപപ്രദേശമായ പാങ്ങിനും ചെറുകുളമ്പിനും ഇടയിലുള്ള പടപ്പറമ്പ് രണ്ട് സ്വരൂപങ്ങളും തമ്മില്‍ നടത്തിയിരുന്ന യുദ്ധത്തിന്റെ വേദിയായിരുന്നു.ഇന്ന് കോട്ടക്കല്‍ എന്നപ്പേരില്‍ അറിയപ്പെടുന്ന വെങ്കിട്ടക്കോട്ട വള്ളുവക്കോനാതിരിയില്‍ നിന്നും സാമൂതിരി പിടിച്ചടക്കിയതാണ്.മഞ്ചേരിക്കടുത്ത് പന്തലൂരാണ്
വള്ളുവക്കോനാതിരിയുടെ പഴയ ആസ്ഥാനം.ആ ഭാഗങ്ങളില്‍ അദ്ദേഹത്തിന്റെ പക്ഷക്കാരെ സാമൂതിരി സ്വാധീനിക്കുകയും അവസാനം വള്ളുവക്കോനാതിരി പന്തലൂര്‍ ഉപേക്ഷിക്കേണ്ടിവരുകയും ചെയ്തു.ആസ്ഥാനം കടന്നമണ്ണയിലേക്ക് മാറ്റിയതും ഈ പാശ്ചാതലത്തിലാണ്. കടന്നമണ്ണ കോവിലകത്തു നിന്നും വേര്‍പിരിഞ്ഞ് പിന്നീട് അരിപ്ര,മങ്കട,ആയിരനാഴി,എന്നീകോവിലകങ്ങള്‍ ഉടലെടുത്തു. വള്ളാട്ടുക്കര രാജവംശം ഈ നാല് കോവിലകങ്ങളിലും പരിമിതമാണ്.

തമ്പുരാന്‍ രാജര്‍ഷി
ഈ കോവിലകങ്ങളിലെ തമ്പുരാക്കന്‍മാരില്‍ ഏറ്റവുംപ്രായംകൂടിയ ആളാണ് വള്ളുവകോനാതിരി.അദ്ദേഹം വലിയ തമ്പുരാന്‍ എന്നറിയപ്പെടുന്നു.അദ്ദേഹം താമസ്സിക്കുക കുറുവയിലെ പ്രത്യേകഭവനത്തിലാണ്.വലിയതമ്പുരാന്‍ ജപത്തിലും പ്രാര്‍ത്ഥനയിലും സമയം ചെലവഴിക്കുന്നു.ഐഹിക ബന്ധങ്ങള്‍ എല്ലാം വിഛേദിച്ച് ആത്മീയകാര്യങ്ങളില്‍ മുഴുകിയിരിക്കുന്ന രാജര്‍ഷിയാണദ്ദേഹം.
മരുമക്കള്‍ അദ്ദേഹത്തിനു വേണ്ടി രാജ്യഭരണം നടത്തുന്നു. ഈ സ്വരൂപത്തിന്റെ ശക്തിക്ഷയത്തിനു ഇടവരുത്തിയതില്‍ ഈ സമ്പ്രദായം വഹിച്ച പങ്ക് പലരും ചൂണ്ടിക്കാട്ടിയിട്ടുണ്ട്.

ആറങ്ങോട്ടിരി എന്നപ്പേരിലാണ് വള്ളുവനാട്ട് രാജാവ് പഴയരേഖകളില്‍ അറിയപ്പെടുന്നത്.ആറിന് അപ്പുറത്തുള്ള രാജ്യത്തിന്റെ അധിപന്‍ എന്നാണ് വിവക്ഷ. ആറുകൊണ്ടുദ്ദേശിക്കുന്നത് പൊന്നാനി പുഴയെയാണ്.

ഹൈദരലിയുടെ ആഗമനം
ഹൈദരലിയും അതിനുശേഷം ടിപ്പുവും മലബാര്‍കീഴടക്കിയ കാലത്ത് വള്ളുവകോനാതിരിയുടെകീഴല്‍ അവശേഷിച്ച പ്രദേശങ്ങള്‍ ഇപ്പോഴത്തെ പെരിന്തല്‍മണ്ണതാലൂക്കുംമണ്ണാര്‍ക്കാട് താലൂക്കില്‍പ്പെട്ട എടത്തനാട്ടുക്കര,അലനല്ലൂര്‍ എന്നീ പ്രദേശങ്ങളും മാത്രമാണ്.തിരുനാവായ,കൊങ്ങാട്,മങ്കര,കവളപ്പാറ,പന്തലൂര്‍ എന്നിവ പാലക്കാട്ടുരാജാവും സാമൂതിരിയും പാലക്കാട്ടു രാജാവും കൈവശപ്പെടുത്തിയിരുന്നു.മൈസൂര്‍ ആക്രമമത്തിനു മുമ്പുതന്നെ വെള്ളാട്ടുകര സ്വരൂപം തങ്ങളുടെ ആസ്ഥാനമായ പന്തലൂര്‍മല ഉപേക്ഷിച്ച് കടന്നമണ്ണയിലേക്ക് പാലായനം ചെയ്തിരുന്നതായാണ് മനസ്സിലാകുന്നത്.

സാമൂതിരിയുടെ ആക്രമണത്തെ പ്രതിരോധിക്കാന്‍ പാലക്കാട് രാജാവ് അഭ്യര്‍ത്ഥിച്ചിരുന്നതനുസരിച്ച് മൈസൂര്‍ സൈന്യാധിപനായ നവാബ് ഹൈദരലിഖാന്‍ ഒരു വലിയ സൈന്യത്തെ മലബാറിലേക്ക് അയച്ചത് 1757ലാണ്.അതുമുതല്‍1792വരെ മലബാറും കൊച്ചിയുടെയും തിരുവിതാംകൂറിന്റെയും പലഭാഗങ്ങളും മൈസൂര്‍ഭരണത്തിന്‍ കീഴിലായിരുന്നു.1792ല്‍ ടിപ്പുവിന്റെ സൈന്യത്തെ ഇംഗ്ലീഷുകാര്‍ മലബാറില്‍ തോല്‍പ്പിക്കുന്നതുവരെ ഇതായിരുന്നു സ്ഥിതി.ടിപ്പുവിന്റെ മലബാര്‍ അധിനിവേശക്കാലത്ത് വള്ളാട്ടുക്കര രാജക്കന്‍മാര്‍ തിരുവിതാംകൂറില്‍ അഭയം തേടിയിയിരുന്നു.

കടന്നമണ്ണ പള്ളിയും ഖബര്‍സ്ഥാനവും

മങ്കട പഞ്ചായത്തിലെ ഏറ്റവും പുരാതന മുസ്ലീംകേന്ദ്രം കടന്നമണ്ണയാണ്.കടന്നമണ്ണപള്ളിക്ക് ഏകദേശം300ലേറെ വര്‍ഷം പഴക്കമുണ്ടെന്നാണ് പറയപ്പെടുന്നത്.മൈസൂര്‍ അധിനിവേശം നടക്കുന്ന1757ന് മുമ്പ് ഈ പള്ളി നിര്‍മ്മിക്കപ്പെട്ടിട്ടുണ്ടെന്നാണ് ഇതില്‍ നിന്നും മനസ്സിലാകുന്നത്.ഈ പള്ളിയുടെ നിര്‍മ്മാണത്തിന്റെ കഥ കൈപ്പുള്ളി വലിയാത്ര കോയക്കുട്ടിസാഹിബ് പറഞ്ഞതുപ്രകാരം ആലങ്ങാട്ട് സ്വരൂപവുമായി വെള്ളാട്ടുകര രാജാവ് സൗഹൃദ ബന്ധത്തില്‍ ആയിരുന്നതിനാല്‍ കുറെ മാപ്പിളമാരെ കടന്നമണ്ണയിലേക്കയക്കാന്‍ വെള്ളാട്ടിരി ആവശ്യപ്പെട്ടു.അത് അനുസരിച്ച് അവിടുന്ന് വന്ന മുസ്ലീംങ്ങള്‍ക്ക് വയലും ഭൂമിയും രാജാവ് നല്കി.അവര്‍ ആലങ്ങാടന്‍മാര്‍ എന്നപ്പേരില്‍ അറിയപ്പെട്ടു.ഇന്നും ഈ പ്രദേശത്തെ ഒരു പ്രബല കുടുംബമാണ് ആലങ്ങാടന്‍ തറവാട്.കടന്നമണ്ണ മുതല്‍ മങ്കട പള്ളിപ്പുറം വരെയുള്ള പ്രദേശത്തെ ഭൂമികള്‍ മിക്കതും ആലങ്ങാടന്‍ മാരുടെതാ-യിരുന്നുവെന്ന് പഴമക്കാര്‍ പറയുന്നു.കടന്നമണ്ണകോവിലകമാണ് കടന്നമണ്ണ പള്ളിക്ക് ഭൂമിനല്‍കിയത്.ഇതു സംബന്ധിച്ച തിട്ടൂരം അരപ്പായകടലാസ്സില്‍ എഴുതിയിരുന്നത് താന്‍ നേരിട്ടു കണ്ടിട്ടുണ്ടെന്ന് കോയക്കുട്ടി സാഹിബ് പറഞ്ഞിട്ടുണ്ട്. ഈ തിട്ടൂരം അല്ലെങ്കില്‍ തിരുവെഴുത്ത് ആലങ്ങാടന്‍ കോട്ടയില്‍ ഇബ്രാഹിമിന്റെ പേരിലാണ്.42സെന്റ് ഭൂമിയാണ് പള്ളിക്ക് കോവിലകം കല്‍പ്പിച്ച് അനുവദിച്ചിരിക്കുന്നത്.ഇന്ന് കാണുന്ന വിശാലമായ കടന്നമണ്ണ ഖബര്‍സ്ഥാന്റെ പിന്നീട് പലകാലത്തായി പള്ളിഭരണാധികാരികള്‍ വാങ്ങിയതാണ്.വെള്ളാട്ടുകര സ്വരൂപതിന്റെ ആസ്ഥാനമായ കടന്നമണ്ണകോവിലകം അന്ന് സ്ഥിതിചെയ്തിരുന്നത് ഇപ്പോഴത്തെ മങ്കട പഞ്ചായത്ത് ഓഫീസ് കെട്ടിടത്തില്‍ നിന്നും ഏതാനും മീറ്റര്‍ പടിഞ്ഞാറ് പെരിന്തല്‍മണ്ണ-മഞ്ചേരി റോഡിന്റെ തെക്കേഭാഗത്തുള്ള ഒരു സ്ഥലത്തായിരുന്നു.ആ സ്ഥലം ഇപ്പോഴും കോലോത്തുംതൊടി എന്നപേരിലാണ് അറിയപ്പെടുന്നത്.അവിടെ നിന്ന് ചിലപുരാതന വസ്തുക്കള്‍ കാര്‍ഷികാവശ്യത്തിനായി കിളച്ചപ്പോള്‍ ലഭിച്ചതായി അറിയുന്നു.

കടന്നമണ്ണയിലെ കൈപ്പുള്ളി,പൂന്തോടന്‍,പട്ടിക്കാടന്‍, പള്ളിയാലില്‍, കാരളിയന്‍ എന്നീ കുടുംബങ്ങള്‍ ആലങ്ങാടന്‍ കുടുംബത്തിന്റ ശാഖകളാണ്.കടന്നമണ്ണപ്പള്ളിക്ക് ആദ്യംകുറ്റിതറച്ചത് ഇപ്പോള്‍ മാട്ടുമ്മത്തൊടിയില്‍ എന്നപ്പേരില്‍ അറിയപ്പെടുന്ന സ്ഥലത്താണ്.അവിടെ നിന്നും ഇപ്പോള്‍ സ്ഥിതിചെയ്യുന്ന സ്ഥലത്തേക്ക് പിന്നീട് മാറ്റി സ്ഥാപിക്കുകയാണ് ചെയ്തത്.

കമ്പനിഭരണം
1792ല്‍ മലബാറിന്റെ ഭരണം ഈസ്റ്റ് ഇന്ത്യ കമ്പനി ഏറ്റെടുക്കുന്ന സമയത്ത് വള്ളുവക്കോനാതിരിയുടെ സ്ഥിതി അസൂയാവഹമായിരുന്നില്ല.സാമ്പത്തികമായും രാഷ്ട്രീയമായും അദ്ദേഹം ദുര്‍ബലനായിരുന്നു.മൈസൂര്‍ ആധിപത്യക്കാലത്ത് ഈ സ്വരൂപത്തിലെ തമ്പുരാക്കന്‍മാര്‍ തിരുവിതാംക്കൂറിലേക്ക് രക്ഷപ്പെട്ടു.പിന്നീട് മൈസൂരിനെതിരെയുള്ള യുദ്ധത്തില്‍ ഇംഗ്ലീഷുക്കാരെ സഹായിക്കാന്‍ അവര്‍ക്ക് കഴിഞ്ഞില്ല.അതിനുള്ള ശക്തി അവര്‍ക്കുണ്ടായിരുന്നില്ല.

ബ്രിട്ടീഷ് ആധിപത്യം സ്ഥാപിതമായപ്പോള്‍ അവര്‍ തിരിച്ചുവരികയുംബ്രിട്ടീഷുക്കാര്‍ അവര്‍ക്ക് നഷ്ടപ്പെട്ട രാജ്യം തിരിച്ചുകൊടുക്കുകയും ചെയ്തു.പക്ഷേ കമ്പനിയുടെ കീഴില്‍ കമ്പനിയുടെ നിയമങ്ങള്‍ നടപ്പിലാക്കാനെ മറ്റുനാടുവാഴികളെപ്പോലെ അവര്‍ക്കും അധികാരം ഉണ്ടായിരുന്നുള്ളൂ.അവര്‍ നികുതി പിരിച്ച് കമ്പനിക്ക് അടച്ചുകൊള്ളണം.വെള്ളാട്ടിരിക്ക് നിശ്ചയിച്ചിരിക്കുന്ന കപ്പം 41594 ½രൂപയായിരുന്നു(മലബാര്‍ മാന്വല്‍ പേജ്.531).

നികുതി നിഷേധം

ഈ സംഖ്യ പിരിച്ചെടുക്കാന്‍ അദ്ദേഹത്തിനു കഴിഞ്ഞിരുന്നില്ല. മാപ്പിളമാരോട് നികുതി ചോദിച്ചാല്‍ അവര്‍ വാളെടുക്കും, നായന്‍മാരാകട്ടെ തങ്ങള്‍ ഇതുവരെ ആര്‍ക്കും നികുതി കൊടുത്തിട്ടില്ല,ഇനിയിപ്പോള്‍ ആര്‍ക്കും നികുതി കൊടുക്കുകയുംമില്ല എന്നു പറഞ്ഞ് പ്രതിഷേധിക്കുകയും ചെയ്തു.നായന്‍മാര്‍ വെള്ളാട്ടിരിയുടെ സൈന്യത്തിന്റെ മുഖ്യ ഘടകമാണ്.അവരായിരുന്നു ചാവേര്‍പ്പടനടത്തി ചത്തും കൊന്നും തങ്ങളുടെ സ്വാമിയെ സേവിച്ചത്.അവര്‍ക്ക് പ്രതിഫലമായി രാജാവ് ഭൂമി നല്‍കിയിരുന്നു.അതിലെ വരുമാനം കൊണ്ടാണ് അവര്‍ ജീവിച്ചിരുന്നത്.അവരില്‍ നിന്ന് രാജാവ് കപ്പം പിരിച്ചിരുന്നില്ല.ടിപ്പുവിന്റെ പടയോട്ടം നായന്‍മാരുടെ മേധാവിത്വത്തിനേറ്റ കനത്ത പ്രഹരമായിരുന്നു.അവരില്‍ പലരും ജീവനും കൊണ്ടോടി നാടുവിട്ടു.

ഏതാണ്ട് നാല്പതു വര്‍ഷം കഴിഞ്ഞ് തിരിച്ചുവന്നപ്പോള്‍ കണ്ടകാഴ്ച അമ്പരപ്പിക്കുന്നതായിരുന്നു.മുസ്ലീംങ്ങള്‍ പലമേഖലകളിലും പ്രാബല്യം നേടിയിരുന്നു.കൃഷിയിലും കച്ചവടത്തിലും അവര്‍ വ്യക്തമായ മേധാവിത്ത്വം സ്ഥാപിച്ചിട്ടുണ്ട്.നായന്‍മാര്‍ക്ക് അവരുടെ പാരമ്പര്യതൊഴിലായ സൈനിക സേവനം നഷ്ടപ്പെടുകയും ചെയ്തിരുന്നു.
നായന്‍മാരും മാപ്പിളമാരും തമ്മില്‍ സ്പര്‍ദ്ധവര്‍ദ്ധിപ്പിക്കുന്ന പല പ്രവര്‍ത്തനങ്ങളും ബ്രിട്ടീഷുക്കാരുടെ ഭാഗത്തുനിന്നുണ്ടാവുകയും ചെയ്തു.
നികുതി നല്കിയില്ലെങ്കില്‍ ബ്രിട്ടീഷുകാര്‍ സ്ഥലം വിടുകയും ടിപ്പു തിരിച്ചുവരുമെന്ന കോവിലകം കാര്യസ്ഥന്‍മാരുടെ ഭീഷണിയൊന്നും നായന്‍മാരില്‍ അനുകൂലപ്രതികരണങ്ങളുണ്ടാക്കിയില്ല.ഏതായാലും നികുതി അടക്കാന്‍ അവര്‍ തയ്യാറായില്ല.

മാപ്പിളമാരാകട്ടെ ബ്രിട്ടീഷുക്കാര്‍ക്ക് ഗുണം ചെയ്യുന്ന സകലതിനും എതിരായിരുന്നു.നാടുവാഴിക്ക് നികുതികൊടുത്താല്‍ അത് എത്തുക കമ്പനിഫണ്ടിലേക്കാണന്നവര്‍ക്കറിയാം.ഇംഗ്ലീഷുക്കാര്‍ക്ക് എതിരായുള്ള പോരാട്ടം നടത്തിയിരുന്ന മഞ്ചേരി അത്തന്‍ കുരിക്കള്‍,ഉണ്ണിമൂസ മൂപ്പന്‍,ചെമ്പന്‍പോക്കര്‍ എന്നിവരുടെ താവളം വള്ളാട്ടുകരയുടെ അതിര്‍ത്തില്‍പ്പെട്ട പന്തലൂര്‍മലയാണ്. ഈ പന്തലൂര്‍ മലയുടെ തെക്കേചരിവ് ചേരിയന്‍മല എന്ന പേരില്‍ അറിയപ്പെട്ടു.ഈ ചേരിയം മലയില്‍ നിന്ന് ഏതാണ്ട് രണ്ട് കിലോമീറ്റര്‍ ദൂരമാണ് കടന്നമണ്ണ കോവിലകത്തേക്കുള്ളത്.

രാജ്യപുരോഗതിക്ക് മാപ്പിള സാനിദ്ധ്യം

സാമൂതിരിയുടെ ശക്തിക്കും ഐശ്വര്യത്തിനും കാരണം മാപ്പിളമാരാണെന്ന് ധരിച്ച വെള്ളാട്ടിരി തന്റെ രാജ്യത്ത് അധിവസിക്കാന്‍ മാപ്പിളമാരെ പ്രേരിപ്പിച്ചു.സാമൂതിരി മുക്കുവരെ ഇസ്ലാമതം വിശ്വസിക്കാന്‍ പ്രേരിപ്പിച്ചതുപോലെ ചെറുമരെ ഇങ്ങനെ ചെയ്യാന്‍ വെള്ളാട്ടിരിയും പ്രേരിപ്പിച്ചു.മുസ്ലീംങ്ങളുടെ സംഖ്യ അദ്ദേഹത്തിന്റെ രാജ്യത്ത് വര്‍ദ്ധിക്കാന്‍ ഇത് ഇടയാക്കി.പുത്തനങ്ങാടി,ചാപ്പനങ്ങാടി,കൂട്ടിലങ്ങാടി, കാപ്പില്‍,
കടന്നമണ്ണ, വലമ്പൂര്‍,മുള്ള്യാകുര്‍ശി,മങ്കടപള്ളിപ്പുറം എന്നീ സ്ഥലങ്ങള്‍ മുസ്ലീം കേന്ദ്രങ്ങളായത് ഇങ്ങനെയാണ്.സാമൂതിരിയുടെ നാട്ടിലെ തിരൂരങ്ങാടിപ്പോലുള്ള മുസ്ലീം കേന്ദ്രങ്ങള്‍ക്കുള്ള ബദലുകളായിരുന്നു ഇവ.ഇവിടെയൊല്ലാം പള്ളി നിര്‍മ്മിക്കാന്‍ നാടുവാഴി സ്ഥലം അനുവദിക്കുകയും അവര്‍ക്ക് ഖാസിമാരെ നിയമിക്കാന്‍ മഖ്ദൂം കുടുംബവുമായി ബന്ധപ്പെടുകയും ചെയ്തിരുന്നു.ഈ സ്ഥലങ്ങളിലെല്ലാം മുസ്ള്യാരകങ്ങള്‍ എന്നപ്പേരില്‍ കുടുംബങ്ങളുണ്ടായത് ഇങ്ങിനെയാണ്.

മലപ്രദേശങ്ങളിലും കുന്നിന്‍ പ്രദേശങ്ങളിലും കുറേ മുസ്ലീങ്ങള്‍ കുടിയേറിപ്പാര്‍ത്തു.അവര്‍ കഠിനമായി അധ്വാനിച്ച് ആ സ്ഥലങ്ങളെ കൃഷിയോഗ്യമാക്കി.ആന,പന്നി,നരി,പാമ്പുകള്‍ തുടങ്ങിയവയോട് പൊരുതിയാണ് കാട്ടു പ്രദേശങ്ങളെ നാട്ടു പ്രദേശങ്ങളാക്കിയത്.മലമ്പനിയും മറ്റ് മഹാരോഗങ്ങളും അവരുടെ ജീവിതം ദുസ്സഹമാക്കിയിരുന്നു.മൈസൂര്‍ ഭരണകാലത്ത് രാജകുടുംബാംഗങ്ങളും ബ്രാഹ്മണരും സവര്‍ണ്ണരും നാട്ടു വിട്ടപ്പോള്‍ മുസ്ലീംകുടിയേറ്റം വര്‍ദ്ധിക്കുകയും ചെയ്തു.കാട് വെട്ടിതെളീയിച്ച് കൃഷിസ്ഥലവും വാസസ്ഥലവും നിര്‍മ്മിച്ചു.അങ്ങാടികളിലും നഗരങ്ങളിലും താമസ്സിക്കുന്ന മാപ്പിളമാരെപ്പോല സംസ്കാര സമ്പന്നരായിരുന്നില്ല ഇവര്‍.കൃഷിയും കന്നുകാലികളുമായിരുന്നു അവരുടെ പ്രധാന ചിന്താവിഷയം.ഇവരെ മറ്റുള്ളവര്‍ പരിഹാസത്തോടെ മാപ്പിളക്കാടന്‍, കാടന്‍മാപ്പിള,ജംങ്ക്ലിമാപ്പിള (ലോഗന്‍സ് മാന്വല്‍)എന്നു വിളിച്ചു.തിരൂരങ്ങാടിപ്പോലുള്ള പഴയ മുസ്ലീംനഗരവാസികള്‍ കിഴക്കരെന്നാണ് ഇവരെ വിശേഷിപ്പിച്ചത്.പരിഷ്കാരം കുറവായിരുന്നുവെങ്കിലും വിളഞ്ഞു നില്‍ക്കുന്ന അവരുടെ നെല്ലുംകുലച്ചു നില്‍ക്കുന്ന വാഴകളും തെങ്ങിന്‍ കമുങ്ങിന്‍ തോട്ടങ്ങളും ജന്മിമാരെയും അവരുടെ കാര്യസ്ഥന്‍മാരെയും അസൂയാലുക്കളാക്കാന്‍ പോന്നതായിരുന്നു.അവര്‍ പലദ്രോഹനടപടികളും കൈകൊണ്ടു.അമിത നികുതി,പാട്ടവും മിച്ചവാരവും ഇവരുടെ മേല്‍ ചുമത്തി.വിസമ്മതിച്ചവരെ ഉഭയത്തില്‍ നിന്നും ഒഴിപ്പിക്കല്‍ സാധാരണയായിരുന്നു.ഈ അനീതികരിക്കെതിരെ മാപ്പിളമാര്‍ പ്രതിഷേധിച്ചു.കായികമായി ചെറുത്ത അവസരങ്ങളുമുണ്ടായി.അത്തന്‍കുരിക്കള്‍,ഉണ്ണിമുസ,
ചെമ്പന്‍പോക്കര്‍ എന്നിവരുടെ വിപ്ലവാശയങ്ങള്‍ ഇവരെ സ്വാധീനിക്കുകയും ചെയ്തിരുന്നു.ഇങ്ങനെ നായന്‍മാരും മാപ്പിളമാരും നികുതി നല്കാന്‍ വിസമ്മതിച്ചപ്പോള്‍ ഈസ്റ്റ് ഇന്ത്യാ കമ്പനി കപ്പമായി നിശ്ചയിച്ച തുക അടക്കുവാന്‍ വള്ളുവകോനാതിരിക്ക് കഴിഞ്ഞില്ല.അതിനാല്‍ ഭരണം ഏറ്റെടുക്കുകയും നികുതി നേരിട്ട് പിരിക്കാന്‍ ഉദ്ദ്യോഗസ്ഥരെ നിയമിക്കുകയും ചെയ്തു.എത്ര സംഖ്യയാണോ നാടുവാഴി കപ്പം കൊടുക്കേണ്ടിയിരുന്നത് അതിന്റെ20% ശതമാനമാണ് മാലിഖാനായി കമ്പനി അവര്‍ക്ക് കൊടുത്തു.ഈ മാലിഖാന്‍ ഇപ്പോഴും അവര്‍ക്ക് ലഭിക്കുന്നുണ്ട്.

മങ്കട കോവിലകം

1792ലാണല്ലോ ബ്രിട്ടീഷുക്കാര്‍ ടിപ്പുവില്‍നിന്നും മലബാര്‍ പിടിച്ചടക്കിയത്.അന്ന് കടന്നമണ്ണ കോവിലകം മാത്രമാണ് നിലനിന്നിരുന്നത്.മങ്കട കോവിലകവും ആയിരനാഴികോവിലകവും അരിപ്ര കോവിലകവും എപ്പോഴാണ് സ്വതന്ത്രങ്ങളായാത് എന്ന് അന്വേഷണങ്ങളില്‍ മനസ്സിലാവുന്നില്ല.മങ്കട കോവിലകത്തെ അംഗമായ എം.സി നന്ദകുമാരരാജ പറയുന്നത് കടന്നമണ്ണയില്‍ നിന്ന് ഭാഗം പിരിഞ്ഞ താവഴി ആദ്യം താമസിച്ചത് കടമ്പോട്ട് കോവിലകത്താണ്. പിന്നീടാണ് ഇപ്പോഴുള്ള സ്ഥലത്ത് കോവിലകം നിര്‍മ്മിച്ചത്.ഇതിന്റെ കാലയളവ് തിട്ടപ്പെടുത്താന്‍ രേഖകളൊന്നും ലഭ്യമല്ല.ഇപ്പോള്‍ കോവിലകം സ്ഥിതി ചെയ്യുന്ന സ്ഥലത്ത് ഒരു നമ്പൂതിരി ഇല്ലവും അയ്യപ്പക്ഷേത്രവുമാണ് ഉണ്ടായിരുന്നത്.ഇല്ലത്തിന് അന്യംവന്നു. അയ്യപ്പക്ഷേത്രം കോവിലകം കോമ്പൗണ്ടില്‍ ഇപ്പോഴും നിലനില്കുന്നു.

മങ്കട സബ്ഡിവിഷന്‍

രാജ്യത്തെ ജില്ലകളും താലൂക്കുകളും ഫര്‍ക്കകളും അംശങ്ങളും ദേശങ്ങളും ആയി ബ്രിട്ടീഷുകാര്‍ വിഭജിച്ചു.1924 മുതല്‍ 26വരെ മലബാറിന്റെ സര്‍വെ നടത്തിയ ലെഫ്.വാര്‍ഡ്,ലെഫ.കേണല്‍ എന്നീ രണ്ടു ഇംഗ്ലീഷുക്കാര്‍ തയ്യാറാക്കിയ A Discriptive Memoir of Malabar എന്ന കൃതിയില്‍ മങ്കട സബ്ഡിവിഷനെപ്പറ്റി പ്രസ്ഥാവിച്ചിട്ടുണ്ട്.അതിലെ രണ്ട് അംശങ്ങള്‍ മങ്കട അംശവും പള്ളിപ്പുറം അംശവുമാണ്.അവയുടെ ക്രമ നമ്പര്‍ 14,15 ആണ്.

ആറുദേശങ്ങള്‍

മങ്കട അംശത്തിന് അതനുസരിച്ച് ആറുദേശങ്ങളുണ്ട്.അവ ക്രമനമ്പറുകളോടൊപ്പം 68മങ്കട,69വെള്ളില്ല,70കടന്നമണ്ണ,
71കര്‍ക്കിടകം,72ഞാറക്കാട്,73കൂട്ടിലായ്(പേജ് 171).ഈ പുസ്തകത്തില്‍ മങ്കടmanagaddaയാണ്.ഈഫര്‍ക്കക്ക് മങ്കട എന്ന പേര് ലഭിച്ചത് മറ്റ് മൂന്ന് കോവിലകങ്ങളെക്കാള്‍ മങ്കട കോവിലകത്തിന് ഉണ്ടായിരുന്ന പ്രാധാന്യം കൊണ്ടായിരിക്കണം.ദേശങ്ങള്‍ക്ക് നമ്പര്‍ കൊടുത്തിരിക്കുന്നത് ഭൂമിശാസ്ത്രപരമായ കിടപ്പ് അനുസരിച്ചല്ല എന്ന് വ്യക്തമാണ്.മങ്കടക്ക് ശേഷം ക്രമനമ്പറില്‍ കടന്നമണ്ണയും വെള്ളിലയും മുമ്പിലായത് ഇവിടെ സ്ഥിതിചെയ്യുന്ന കോവിലകങ്ങളുടെ പ്രാധാന്യം കൊണ്ടായിരിക്കണം.കൂട്ടിലായ ഇപ്പോഴത്തെ കൂട്ടിലാണ്.ആയിരനാഴി കോവിലകത്തിന്റെ സാനിദ്ധ്യമാണ് വെള്ളിലക്ക് പ്രാധാന്യം നല്കിയത്.ഇപ്പോള്‍ ഞാര്‍ക്കാട് ദേശമില്ലെന്നും ചേരിയം ദേശമാണ് ഉള്ളതെന്നും ശ്രദ്ധേയമാണ്.ഓരോ പ്രദേശത്തെയും പ്രധാനപ്പെട്ട കെട്ടിടങ്ങളും ക്ഷേത്രങ്ങളും പള്ളികളും കാവുകളും ഈ സര്‍വ്വെ ബുക്കില്‍ രേഖപ്പെടുത്തിയിരിക്കുന്നു.മങ്കട ദേശത്തെ മുഖ്യസ്ഥന്റെ വീട് പന്തലൂര്‍ മലയില്‍നിന്ന്2മൈല്‍ 31/4ഫര്‍ലോങ്ങ് അകലെയാണെന്നാണ് ആ രേഖ പറയുന്നത്.ആ മുഖ്യസ്ഥന്‍ മങ്കട കോവിലകത്തെ തമ്പുരാനായിരിക്കാനാണ് സാധ്യത.വെള്ളിലയിലെ ഒരു കാവിനെ പറ്റി(കോവ്)പ്രസ്ഥാവിക്കുന്നുണ്ട്.മൂന്ന് കോവിലകങ്ങളെ പറ്റിയും പരാമര്‍ശമില്ലെന്നത് അത്ഭുതകരമായിരിക്കുന്നു.

വള്ളാട്ടിരിയുടെ ആസ്ഥാനം അങ്ങാടിപ്പുറമാമെന്നാണ് പുസ്തകത്തില്‍ കാണുന്നത്.അവിടുത്തെ ക്ഷേത്രത്തെപറ്റിയും രേഖപ്പെടുത്തിടുണ്ട്. കോഴിക്കോട്-പാലക്കാട് റോഡും,മഞ്ചേരി-ആനകയം കര്‍ക്കിടകം വഴി പോകുന്നതായി പറയുന്നുണ്ടെങ്കിലും മങ്കടയെ ഈ വഴിയില്‍ കാണുന്നില്ല.മലപ്പുറത്ത് കൂടിയുള്ള കോഴിക്കോട്-പാലക്കാട് റോഡിനെ പറ്റി പരാമര്‍ശമില്ലെന്ന് മനസ്സിലാവുന്നത് ആ റോഡ് അന്ന് ഇല്ലായിരുന്നുവെന്നാണ്. 1800കാലത്ത് മലബാര്‍ സന്ദര്‍ശിച്ച ബുക്കാനന്റെ A journey from Madras എന്ന കൃതിയില്‍ മങ്കടയെ സംബന്ധിച്ച് യാതൊരു പരാമര്‍ശവുമില്ല.മങ്കടയിലെ നെല്‍വയലുകളെപറ്റി ബുക്കാനന്‍ രേഖപ്പെടുത്തീട്ടുണ്ടെന്ന് സര്‍ദാര്‍ കെ.എം പണിക്കരും ,ഡോ.സി.കെ കരീമും എഴുതിയത് മങ്കടയും മങ്കരയും തിരിച്ചറിയാത്തതിനാലാണ്.മങ്കര പാലക്കാടിനടുത്താണ്. പാലക്കാട്ടു നിന്നുള്ള അദ്ദേഹത്തിന്റെ സഞ്ചാരപഥത്തില്‍ മങ്കരയുണ്ടായിരുന്നു.മങ്കടയില്ലായിരുന്നു.പത്മനാഭമേനോന്റെ കൊച്ചിരാജ്യചരിത്രത്തില്‍ കടന്നമണ്ണ കോവിലകം പരാമര്‍ശ വിധേയമായിട്ടുണ്ട്.AD1800നു മുമ്പുള്ള സംഭവങ്ങള്‍ പ്രതിപാദിച്ച ഒരു കൃതിയിലും മങ്കടയെകാണുന്നില്ല.എന്നാല്‍ കേരള ആര്‍ക്കൈവ്സ് പ്രസിദ്ധീകരിച്ച ചരിത്രരശ്മികള്‍ പേജ് 26ല്‍ മങ്കടയെ സംബന്ധിച്ച് താഴെപറയുന്ന ഒരു പരാമര്‍ശമുണ്ട്.1792 ജൂലായ് 30ന് വെള്ളാട്ടുക്കര രാജാവ് ഇറ്റലിക്കാരായ മാര്‍ഷല്‍ഹീത്ത്,ജോര്‍ജ്ജ്നോര്‍ട്ടന്‍ എന്നിവര്‍ക്ക് മങ്കട ദേശത്തെ ഇരിങ്ങാട്ട് കുന്നിലും ,തച്ചമ്പാറ അംശത്തെ പൊടിവണ്ണിക്കുന്നിലും, അരക്ക്പറമ്പ് അംശത്തിലെ പട്ടുവക്കുന്നിലും പാണ്ടിക്കാട് അംശത്തിലെ തെയ്യംപാടികുന്നിലും വേങ്ങൂര്‍ദേശത്തെ നെല്ലിക്കുന്നിന്‍മേലും പൂന്താനം ദേശത്തെ ചെറിയപറമ്പ് കുന്നിലും തുടങ്ങി പത്തോളം സ്ഥലങ്ങളില്‍ഇരുമ്പ് ഖനനത്തിന് അനുമതി നല്‍കികൊണ്ട് ഉത്തരവിറക്കി.


മങ്കടചേരിയത്തുള്ള കുടുംബങ്ങളുടെ മുന്‍ഗാമികള്‍ ഇവിടെ താമസമാക്കിയത് ഇരുമ്പയിര്‍ ഖനനം ചെയ്യല്‍,ഉരുക്കല്‍ തുടങ്ങിയ തൊഴിലുകള്‍ക്ക് വേണ്ടിയായിരുന്നു.കരുവാരുകുണ്ട്,പാണ്ടിക്കാട് ഭാഗത്തുനിന്നാണ് അവര്‍ വന്നത്.

മങ്കട കോവിലകകാരുടെ ആഗമനത്തിനുമുമ്പ് മങ്കട ദേശത്ത് മുസ്ലീം സാനിദ്ധ്യം ഉണ്ടാകാനുള്ള സാധ്യതയില്ല.എന്നാല്‍ മുസ്ലീം കേന്ദ്രങ്ങളായ മുള്ള്യകുര്‍ശി,വലമ്പൂര്‍,കടന്നമണ്ണ എന്നിവയുമായുള്ള സാമീപ്യം കാരണത്താല്‍ കൂട്ടില്‍,ചേരിയം എന്നീ ദേശങ്ങളില്‍ മുസ്ലീം സാനിദ്ധ്യം നേരത്തെയുണ്ട്.
മങ്കടയില്‍ ഹൈന്ദവ സാനിദ്ധ്യം മുമ്പ് തന്നെയുണ്ട്.മാണിയോട്ട് അമ്പലം അഥവാ മാണിക്യേടത്ത് ക്ഷേത്രം നിര്‍മ്മിച്ചത്600വര്‍ഷങ്ങള്‍ക്ക് മുമ്പാണെന്ന് ക്ഷേത്രത്തിലം ശിലാലിഖിതത്തിലുണ്ട്.വട്ടെഴുത്താണത്.മാമ്പറ്റകുമാരന്‍ നായരാണ് അത് നിര്‍മ്മിച്ചതെന്ന് വ്യക്തമായി രേഖപ്പെടുത്തീട്ടുണ്ട്.ഏഴ് പുരാതന നായര്‍ തറവാടുകള്‍ കോവിലകത്തിനു മുമ്പ് തന്നെ ഇവിടെ സ്ഥിതി ചെയ്തിരുന്നതായി കേള്‍ക്കുന്നുണ്ട്.

മങ്കട എന്ന പേര്.

പടി‌‌ഞ്ഞാറ് പന്തലൂര്‍മലയും,വടക്ക് നെന്‍മിനി മലയുംകിഴക്ക് മുള്ള്യാകുര്‍ശി ചേര്‍ന്ന കേട്ടമല വെള്ളാരം കുന്നും,തെക്ക് പെരുംപറമ്പ്,പടുവില്‍കുന്ന്,മുത്തപ്പന്‍പാറ ഇവയ്കിടയിലാണ് മങ്കട സ്ഥിതി ചെയ്യുന്നത്.മങ്കട അംശത്തില്‍ ആറ് ദേശങ്ങളാണ് ഉണ്ടായിരുന്നത്മങ്കട,വെള്ളില,കര്‍ക്കിടകം,കടന്നമണ്ണ,‌ 
ഞാറക്കാട്ട്(ചേരിയം),കൂട്ടിലായ്(കൂട്ടില്‍)എന്നിവയായിരുന്നു അവ.
കിഴക്ക് ഭാഗത്തുള്ള പന്തലൂര്‍ മലയിലെ മാന്‍പേടകള്‍ കോവിലകത്തിനു കിഴക്കുള്ള തോടുകടന്നുവന്നതിനെ അനുസരിച്ച്"മാന്‍കടവ്"ലോപിച്ച് മങ്കടയായി മാറി എന്നൊരൈതീഹ്യമുണ്ട്.അതല്ല 'മണ്‍കട്ട 'എന്ന പദത്തില്‍ നിന്നും വന്നതാണെന്നും പറയുന്നു.'മന്‍'എന്ന അറബി വാക്കും 'കിട' എന്ന മലയാളംവാക്കും ചേര്‍ന്ന് ഉണ്ടായ 'മന്‍കിട'(ആര്‍കിട)കാലന്തരത്തില്‍ മങ്കടയായി തീര്‍ന്നതാവാം എന്നും കരുതുന്നുണ്ട്.ഈ പ്രദേശത്തെ 'മങ്കമാരെ 'തേടി മുന്‍കാലങ്ങളില്‍ നായന്‍മാര്‍ സംബന്ധത്തിനായി വന്നിരുന്നെന്നും അങ്ങനെ മങ്കമാരുടെ നാട് മങ്കടയായതായും വിശ്വസിക്കുന്നവരുണ്ട്.എന്തായാലും മതസൗഹാര്‍ദ്ധം കൊണ്ടു അനുഗ്രഹീതമാണ് ഈ നാട്.


കടപ്പാട്: മങ്കട ഓര്‍ഫനേജ് സുവനീര്‍.

പാഠ്യപദ്ധതികൾ ആർക്കു വേണ്ടിയാണ് ?



  പാഠ്യപദ്ധതി രൂപീകരണത്തിന്റെ ചരിത്ര നാൾ വഴികളിൽ ഏറെ വ്യതിരിക്തമായതും ,വിദ്യാഭ്യാസ രംഗത്തിന്റെ സമൂലമായ പരിവർത്തനങ്ങൾ സാധ്യമായിട്ടുള്ളതുമായ പരിഷ്ക്കരണ പ്രവർത്തനങ്ങൾക്ക് തുടക്കം കുറിച്ചത് 1997 -98 കാലയളവിലാണ് .വിദ്യാഭ്യാസത്തിന്റെ ഗുണമേന്മ ഉറപ്പു വരുത്തുന്നതിനായി 1980 കളിൽ തുടക്കമിട്ട ദേശീയ -അന്തർദേശീയ ചർച്ചകളും ,അതിന്റെ പ്രകാശനമെന്നോണം വിദ്യാഭ്യാസ ദർശനങ്ങളിലും ,സൈദ്ധാന്തിക തലങ്ങളിലും കടന്നു വന്ന മാറ്റങ്ങളും ,അതിനനുസൃതമായി രൂപം കൊടുത്ത നയ രേഖകളും 1997 -ലെ പാഠ്യപദ്ധതി പരിഷ്കരണത്തിന് സുഭദ്രമായ  അടിത്തറ പാകാൻ സഹായകമായിരുന്നു. പാഠ്യപദ്ധതി പരിഷ്കരണങ്ങൾക്ക് ഏകീകൃതമായ ചില അടിസ്ഥാന തത്വങ്ങൾ ശുപാർശ ചെയ്തു കൊണ്ട് ദേശീയ പാഠ്യപദ്ധതി ചട്ടക്കൂട് (National Curriculum Framework) 2005 ലും,അതിന്റെ ചുവടു പിടിച്ചു തനതു സാമൂഹ്യ ,സാംസ്ക്കാരിക,പാരിസ്ഥിതി സാഹചര്യങ്ങളോട് അനുയോജ്യമാകും വിധം ഓരോ സംസ്ഥാനവും അവരവരുടേതായ പാഠ്യപദ്ധതികളും രൂപപ്പെടുത്തുകയുണ്ടായി .കേരളത്തിൽ ആ വിധം പരിഷ്കരിക്കപെട്ട പാഠ്യപദ്ധതി രേഖയാണ്  2007 ൽ നിലവിൽ വന്ന കേരളപാഠ്യപദ്ധതി ചട്ടക്കൂട് (Kerala Curriculum Framework 2007 ).

2007 ലെ പാഠ്യപദ്ധതി പരിഷ്ക്കരണത്തിന്റെ ഭാഗമായി നടപ്പിലാക്കിയ പഠന പ്രക്രിയകളും ,പാഠപുസ്തകങ്ങളും ആണ് ഇന്ന് വിദ്യാലയങ്ങളിൽ നിലവിലിരിക്കുന്നത് .ഈ വഴിയിൽ ഏറ്റവും ഒടുവിലായി  കേരള സ്കൂൾ പാഠ്യപദ്ധതി -2013 ന്റെ രൂപരേഖ ഓഗസ്റ്റു മാസത്തിൽ സമർപ്പിക്കപെട്ടിരിക്കുന്നു . അടുത്ത അധ്യയന വർഷത്തിലേക്കായി അണിയറയിൽ ഒരുക്കങ്ങൾ പൂർത്തിയാക്കി കൊണ്ടിരിക്കുകയാണ് പുതിയ പാഠ്യപദ്ധതി. ഇത്തരം സാഹചര്യത്തിൽ സ്വാഭാവികമായും നടപ്പു വർഷത്തിലെ  പാഠ്യപദ്ധതിയുടെ ജയ പരാജയങ്ങളും ,വരാനിരിക്കുന്ന പാഠ്യപദ്ധതിയെ കുറിച്ചുള്ള പ്രതീക്ഷകളും ,ആകുലതകളും വിശകലന വിധേയമാക്കേണ്ടതാണ് .


കേരളപാഠ്യപദ്ധതി ചട്ടക്കൂട് (K.C.F 2007 ).


ജ്ഞാന നിർമിതി വാദവും ,വിമർശനാത്മക ബോധനവും(Critical Pedagogy) അടിസ്ഥാന സമീപനങ്ങളായി സ്വീകരിച്ചു 2007 ൽ  നിലവിൽ  വന്ന  പാഠ്യപദ്ധതി ചട്ടക്കൂട് വിദ്യാഭ്യാസത്തിന്റെ നിർവചനങ്ങൾക്കും ,പഠന പ്രക്രിയകൾക്കും ,അദ്ധ്യാപക -വിദ്ധ്യാർഥി ബന്ധങ്ങൾക്കും പുതിയ മാനങ്ങളും ,അർത്ഥ  തലങ്ങളും  നല്കിയിരുന്നു .അറിയാൻ പഠിക്കുക(Learning to Know) ,ചെയ്യാൻ പഠിക്കുക(Learning to Do) ,സഹജീവനത്തിനു പഠിക്കുക(Learning to Live Together) ,ആയിത്തീരാൻ പഠിക്കുക(Learning to Be)  എന്നീ ചതുർ സ്തംഭ വിദ്യാഭ്യാസ സങ്കൽപ്പത്തിൽ അധിഷ്ഠിതമായ പഠന പ്രക്രിയകൾ അത്രയും പഠിതാവിനെ കേന്ദ്രീകരിച്ചുള്ളതായിരുന്നു .കൂടാതെ ബഹുത്വ ബൌദ്ധികതയ്ക്കു(Multiple Intelligence) പ്രാധാന്യം നല്കുകയും ചെയ്തു .പിയാഷിയൻ ജ്ഞാതൃ വാദത്തെ സാമൂഹ്യ -ജ്ഞാതൃ വാദമാക്കി(social constructivism) പരിവർത്തനം ചെയ്യുന്നതിന്റെ ഭാഗമായി പിന്നീട് സഹകരണാത്മക -സഹവർത്തിത്വ(Cooperative and Collaborative)  പഠനരീതികൾ പ്രാവർത്തികമാക്കി .ഇതിനായി തനിച്ചുള്ള പ്രവർത്തനത്തിനപ്പുറം ,സംഘ പ്രവർത്തനത്തിന് പ്രാമുഖ്യം നൽകുന്ന അധ്യയന തന്ത്രങ്ങൾ നിർദ്ദേശിക്കപ്പെട്ടു .

വിമർശനാത്മക ബോധനം ,പ്രശ്നാധിഷ്ടിത പഠന രീതിയിലൂടെ(Issue Based Learning) പ്രയോഗ തലത്തിൽ എത്തിക്കാനുള്ള നീക്കങ്ങളും നടത്തി.വിദ്യാഭ്യാസത്തെ സമകാലിക സാമൂഹിക യാഥാർത്ഥ്യങ്ങളോട് അടുപ്പിച്ച്  ,സമൂഹത്തിലെ എല്ലാ വിധ അധീശത്വങ്ങളെയും ചോദ്യം ചെയ്യാൻ കുട്ടിയെ പ്രാപ്തനാക്കുക എന്ന വിപ്ലവകരമായൊരു ലക്ഷ്യം ഈ ബോധന രീതിയ്ക്കുണ്ടായിരുന്നു .അതിനായി കേരളം അഭിമുഖീകരിച്ചു കൊണ്ടിരിക്കുന്ന പ്രശ്നങ്ങൾ ചർച്ചകളിലൂടെ കണ്ടെത്തി വിവിധ പ്രശ്ന മേഖലകളാക്കി തിരിച്ചു . ഈ പ്രശ്ന മേഖലകളെ അടിസ്ഥാനമാക്കിയുള്ള പഠനത്തിലൂടെ ,ഓരോ വിഷയത്തിലും ,ഓരോ പാഠഭാഗത്തിലും എത്തിച്ചേരേണ്ട നിശ്ചിതമായ ധാരണകളും ,മാനോഭാവങ്ങളും പട്ടികപ്പെടുത്തി . ഈ വിധം സമഗ്രമായ സിലബസ്സ് ഗ്രിഡ്കൾക്ക് രൂപം നല്കിയാണ് പാഠപുസ്തകങ്ങൾ തയ്യാറാക്കപ്പെട്ടത് .ഒപ്പം അധ്യാപക സഹായി ,കൈ പുസ്തകങ്ങൾ ,നിരന്തരവും ,സമഗ്രവുമായ മൂല്യ നിർണയ ഉപാധികളും ,മറ്റു പഠന സാമഗ്രികളും ഒരുക്കിയിരുന്നു . ക്ലാസ് മുറികളിലെ എകാധിപതികൾ അഥവാ അറിവ് നിക്ഷേപകൻ എന്ന സ്ഥാനത്തു നിന്ന്  ''പ്രേരകർ'' ,''കൈത്താങ്ങ്‌ നൽകുന്നവർ'' എന്ന നിലയിലേക്ക് അധ്യാപകരുടെ റോൾ തിരുത്തി എഴുതപ്പെട്ടു .അധ്യാപക പരിശീലനത്തിനും ,മോണിറ്ററിംഗ് പ്രവർത്തനങ്ങൾക്കും ബന്ധപെട്ട അധികാര കേന്ദ്രങ്ങളെ നിയോഗിച്ചു .


ഈ വിധം കെട്ടുറപ്പോടെയും ,സൈദ്ധാന്തിക പിൻബലത്തോടെയുമാണ് 2007 ലെ പാഠ്യപദ്ധതി നടപ്പിൽ വന്നത് .വിദ്യാഭ്യാസ പരിവർത്തനങ്ങൾക്ക് വ്യക്തമായ ദിശാ ബോധമുണ്ടെന്ന് തെളിയിച്ച ഈ പരിഷ്കരണ പ്രവർത്തനങ്ങൾക്ക് പക്ഷെ ചില പിഴവുകൾ പദ്ധതി നിർവഹണത്തിൽ സംഭവിക്കുകയും ചെയ്തിട്ടുണ്ട് .


വിമർശനങ്ങളുടെ തുടക്കവും ,തുടർച്ചകളും :


1997 ൽ ആരംഭിച്ച പാഠ്യപദ്ധതി പരിഷ്ക്കരണം പ്രധാനമായും ലക്ഷ്യമിട്ടത് വലിയൊരു കാലഘട്ടം വിദ്യാഭ്യാസ രംഗത്ത് നില നിന്ന് പോന്ന വ്യവഹാര വാദത്തിൽ നിന്ന് പ്രക്രിയാധിഷ്ടിതവും ,ശിശു കേന്ദ്രീകൃതവുമായ ജ്ഞാന നിർമ്മിതി വാദത്തിലേക്കുള്ള സമൂലമായ മാറ്റമായിരുന്നു .ഈ മാറ്റം ദാർശനികവും ,മനശാസ്ത്രപരവുമായ 
അടിത്തറയോട് കൂടിയത് ആയിരുന്നെങ്കിലും അധ്യാപകരിലും ,രക്ഷിതാക്കളിലും തുടക്കത്തിൽ വലിയ ആശയകുഴപ്പങ്ങളും ,അരക്ഷിതാവസ്ഥയും സൃഷ്ടിച്ചിരുന്നു . ഡി .പി .ഇ പി  പാഠ്യപദ്ധതി ലോക ബാങ്ക് അജണ്ടയാണെന്നും ,കുട്ടികൾ അക്ഷരം പഠിക്കുന്നില്ല ,പരീക്ഷ ഇല്ല ,പഠനമില്ല ,കളികൾ മാത്രമേ ഉള്ളൂ എന്നു തുടങ്ങിയ ആരോപണങ്ങൾ അക്കാലത്തു ശക്തമായിരുന്നു .എങ്കിൽ കൂടിയും പരീക്ഷണങ്ങൾ ഏറ്റെടുക്കാൻ തയ്യാറായ അധ്യാപകരിലൂടെ വിമർശനങ്ങളുടെ തീവ്രത ക്രമേണ കുറഞ്ഞു വന്നു .ഹൈസ്കൂൾ തലത്തിലേക്ക് പുതിയ പാഠ്യപദ്ധതി രംഗ പ്രവേശം ചെയ്ത ഘട്ടത്തിലാണ് 2001 ൽ യു.ഡി എഫ് സർക്കാർ അധികാരത്തിൽ വന്നത് .എട്ടാം തരത്തിലേക്ക് തയ്യാറാക്കിയ പാഠപുസ്തകങ്ങൾ പിൻവലിച്ചെങ്കിലും ,പിന്നീടു വീണ്ടും ചെറിയ മാറ്റങ്ങളോടെ അതെ പുസ്തകം പുറത്തിറക്കി .അതിനു ശേഷം അധികാരത്തിൽ വന്ന എൽ .ഡി .എഫ്‌ സർക്കാറിന്റെ കാലത്താണ് വിമർശനാത്മക ബോധനം അടിസ്ഥാന സമീപനമാക്കിയ പാഠപുസ്തകങ്ങൾ തയ്യാറാക്കപെട്ടത്‌.അങ്ങിനെ രൂപപ്പെടുത്തിയ 2008 ലെ ഏഴാം തരത്തിലെ സാമൂഹ്യ ശാസ്ത്രം പാഠപുസ്തകത്തിലെ ''മതമില്ലാത്ത ജീവൻ '' എന്ന പാഠഭാഗത്തെ ചൊല്ലിയുണ്ടായ സമരങ്ങൾ കേരള ജനതയെ ഞെട്ടിക്കും വിധം അക്രമാസക്തമായി . ഈ സംഭവമാണ് പാഠപുസ്തക വിശകലനത്തിനായി കെ.എൻ .പണിക്കർ അദ്ധ്യക്ഷനായ വിദ്ധഗ്ത  സമിതി രൂപീകരണത്തിനുള്ള സാഹചര്യം സൃഷ്ട്ടിച്ചത് .പണിക്കർ കമ്മിറ്റി റിപ്പോർട്ടിന്റെ അടിസ്ഥാനത്തിലാണ് പ്രധാനമായും കേരള സ്കൂൾ പാഠ്യപദ്ധതി 2013 രൂപരേഖ ഉടലെടുത്തതെന്നാണ് പുതിയ കരിക്കുലം കമ്മിറ്റി അവകാശപ്പെടുന്നത് .ഈ പാഠ്യപദ്ധതിയും ഇതിനകം ആരോപണ വിധേയമായി കഴിഞ്ഞിരിക്കുന്നു .

പിഴവുകളും ,പാളിച്ചകളും ? 

മുൻകാല പരിഷ്കരണങ്ങളെ വെച്ച് താരതമ്യം ചെയ്യുകയാണെങ്കിൽ 2007 ലെ പാഠ്യപദ്ധതി കൂടുതൽ മികച്ച തലങ്ങളിലേക്ക് പൊതു വിദ്യഭ്യാസ രംഗത്തിന്റെ നിലവാരം ഉയർത്തുന്നതിനു ഇടയാക്കിയിട്ടുണ്ട് എന്ന് തന്നെ പറയാവുന്നതാണ് .സ്വകാര്യ വിദ്യാലയങ്ങളോട് കിട പിടിക്കാൻ കഴിയും വിധം പൊതു വിദ്യാഭ്യാസ സംവിധാനങ്ങളുടെ മികവു തെളിയിക്കാനും കഴിഞ്ഞിട്ടുണ്ട് .എന്നാൽ പദ്ധതി നിർവ്വഹണത്തിലെ പാളിച്ചകൾ ഈ പുരോഗതിയെ പലപ്പോഴും പുറകോട്ടടിച്ചു .

പുതിയ വിദ്യഭ്യാസ ദർശനങ്ങളെ കുറിച്ച് അധ്യാപകർ രൂപപ്പെടുത്തിയെടുത്ത അടിസ്ഥാന ധാരണകളിലും ,വീക്ഷണങ്ങളിലും സംഭവിച്ചുപ്പോയ പിഴവുകൾ ,പുതിയ വിദ്യാഭ്യാസ കാഴ്ചപ്പാടുകളെ അടിസ്ഥാനപ്പെടുത്തി അധ്യാപകരെ ആശയപരമായും ,പ്രായോഗിക പരമായും ശാക്തീകരിക്കുന്നതിൽ നേരിട്ട പരാജയവും ആയിരുന്നു പ്രധാന പ്രശ്നങ്ങൾ.ഇരുപതു ശതമാനം അധ്യാപകർ മാത്രമാണ് പുതിയ ദർശനങ്ങൾ  ശരിയായി സ്വാംശീകരിച്ചതെന്നു കേരള ശാസ്ത്ര സാഹിത്യ പരിഷത്തിന്റെ ഒരു പഠനം വെളിപ്പെടുത്തുന്നുണ്ട് .കാലങ്ങളായി ചേഷ്ട്ടാ വാദത്തോട് പഴകി വന്ന ഒരു വലിയ വിഭാഗം അധ്യാപകർ അതേ ''അസംബ്ലിംഗ് മോഡലിനോട് '' തന്നെ വിധേയത്വം തുടർന്ന് പോന്നു .പ്രശ്നാതിഷ്ടിത ബോധന മാതൃകയിൽ പാഠപുസ്തകങ്ങൾ തയ്യറാക്കിയപ്പോൾ ഉള്ളടക്കത്തിൽ അതിനു അനുയോജ്യമായ ചേരുവകൾ മാത്രമാണ് ഉൾപ്പെടുത്തിയത് എന്ന വിമർശനവും ഈ പാഠ്യപദ്ധതിക്കുണ്ടായി . സിലബസ്സ് നിർദ്ദേശിച്ച പ്രശ്ന മേഖലകളിലേക്ക് പാഠഭാഗങ്ങളെ സ്വാഭാവികതയോട് കൂടി സംക്രമിപ്പിക്കുന്നതിനു പല വിഷയങ്ങളിലും പ്രയാസം നേരിട്ടു .ഇതു പഠനത്തെ യാന്ത്രികമാക്കി .

സഹകരണാത്മക-സഹവർത്തിത്വ ബോധന തന്ത്രങ്ങൾ പലതും ഫലപ്രദമായി വിനിയോഗിക്കപെടാതെ പോയതും പാഠ്യപദ്ധതി ചിട്ടപ്പെടുത്തിയ പഠനോദേശ്യങ്ങൾ നേടിയെടുക്കുന്നതിന് വിഘാതമായി .ക്ലാസ്സ്‌ മുറികളിൽ അരങ്ങേറിയ സംഘ പഠന പ്രവർത്തനങ്ങൾ പലപ്പോഴും ക്ലാസ്സിന്റെ ഘടന കൊണ്ടും ,നടത്തിപ്പിലെ അപാകതകൾ കൊണ്ടും ദയനീയമായി പരാജയപ്പെട്ടു .പഠനത്തിൽ ശരാശരി നിലവാരത്തിനേക്കാൾ താഴെ നിൽക്കുന്ന പഠിതാക്കൾ ജ്ഞാന നിർമ്മിതിയുടെ പരിധിക്കുള്ളിൽ ഇടപെടാനുള്ള ആർജ്ജവവും ,ആത്മവിശ്വാസവും കാണിക്കാതെ ,ഗ്രൂപ്പ് പ്രവർത്തനങ്ങളിൽ പകർത്തിയെഴുത്തുകാർ മാത്രമായി മാറി സ്വയം ഉൾവലിയുകയോ , പഠന നിലവാരത്തിൽ കൂടുതൽ പുറകിലേക്ക് തഴയപ്പെടുകയോ ചെയ്തു .പാഠഭാഗങ്ങൾ എങ്ങിനെയെങ്കിലും എടുത്തു തീർക്കുകയാണ് പരമ പ്രധാനമായ ധർമ്മം എന്ന് കരുതുന്ന അധ്യാപകർ ഈ വിഭാഗത്തിന് നേരെ സൗകര്യ പൂർവ്വം കണ്ണടക്കുകയും ചെയ്തു .ഭാഷാ പഠനത്തിൽ നേട്ടം കൈവരിക്കാൻ കഴിഞ്ഞിട്ടുണ്ടെന്നു അവകാശപ്പെടുമ്പോഴും ,നല്ലൊരു ശതമാനം കുട്ടികൾക്കും വേണ്ടത്ര അക്ഷര ജ്ഞാനം ഇല്ലെന്നു അധ്യാപകർ സാക്ഷ്യപ്പെടുത്തുന്നുണ്ട് .പരമ്പരാഗത ക്ലാസ്സ്‌ മുറികൾ ,പഠന സാമഗ്രികൾ ,പഠിതാക്കളുടെ എണ്ണം ഇവയെല്ലാം പലയിടത്തും പ്രതികൂല ഘടകങ്ങൾ ആയി എന്ന് പറയപ്പെടുന്നു .ഇത്തരത്തിൽ പാഠ്യപദ്ധതി നിർവ്വഹണത്തിൽ ഉയർന്നു വന്ന നിരവധി വിമർശനങ്ങളെയും ,കുറവുകളെയും വേണ്ട വിധം നേരിടുന്നതിനോ ,പരിഹരിക്കുന്നതിനോ സാധിക്കാതെ വന്നത് പരാജയത്തിന്റെ ആക്കം കൂട്ടി .



മേൽപറഞ്ഞ പല പിഴവുകളും പണിക്കർ കമ്മിറ്റി റിപ്പോട്ടും ചൂണ്ടി കാണിച്ചിട്ടുണ്ട് .പക്ഷെ ഈ റിപ്പോട്ടിൽ ഒരിടത്തും പാഠ്യപദ്ധതി മാറ്റണമെന്നോ,ബോധന രീതി തള്ളികളയണം എന്നോ നിർദേശിച്ചിട്ടില്ല .പാഠപുസ്തക നിർമാണത്തിലും ,പുനർ നവീകരണത്തിലും സ്വീകരിക്കേണ്ട ചില രീതികൾ ,കാലോചിതമായി പാഠപുസ്തകങ്ങൾ പരിഷ്ക്കരിക്കേണ്ടതിന്റെ ആവശ്യകത .വിദ്യാഭ്യാസ ദർശനങ്ങളുടെ വിജയത്തിന് അധ്യാപകരും ,പാഠപുസ്തക ഉള്ളടക്കവും വഹിക്കുന്ന പങ്ക് ,പാഠപുസ്തകങ്ങൾ മോണിറ്റർ ചെയ്യുന്നതിന് പാഠപുസ്തക കമ്മീഷൻ രൂപീകരിക്കേണ്ടതിന്റെ ആവശ്യകത എന്നിങ്ങനെ പതിനേഴോളം നിർദേശങ്ങളാണ് പണിക്കർ കമ്മിറ്റി റിപ്പോട്ടിൽ ഉള്ളതെന്ന് പറയപ്പെടുന്നു .നിലവിലുള്ള പാഠ്യപദ്ധതിയുടെ പരാജയം പരിഹരിക്കാൻ മുതിരാതെ പണിക്കർ കമ്മിറ്റി റിപ്പോട്ടിലെ  ചുരുക്കം ചില നിർദേശങ്ങളെ അടിസ്ഥാനപ്പെടുത്തിയും ,ഒരു സർവ്വേ നടത്തി കിട്ടിയ നിഗമനങ്ങളെ മുൻ നിർത്തിയും ആണ് ഇപ്പോഴത്തെ  യു.ഡി.എഫ് സർക്കാർ  കേരള സ്‌കൂൾപാഠ്യപദ്ധതി 2013 രൂപരേഖ പുറത്തിറക്കിയത് എന്നതാണ് പുതിയ ചർച്ചാ വിഷയം .


കേരള സ്‌കൂൾ പാഠ്യപദ്ധതി 2013 



അലിഗഡ് സർവകലാശാല മുൻ വൈസ് ചാൻസലർ ആയ ഡോ .പി.കെ .അബ്ദുൾ അസീസിന്റെ നേതൃത്വത്തിൽ തയ്യാറാക്കി സമർപ്പിക്കപെട്ട കേരള സ്‌കൂൾ പാഠ്യപദ്ധതി 2013 രൂപരേഖ ഇതിനകം തന്നെ ചർച്ചകൾക്ക് തുടക്കം കുറിച്ചിട്ടുണ്ട് .ഒരു പാഠ്യപദ്ധതി നിർമ്മിക്കപെടുമ്പോൾ സ്വീകരിക്കേണ്ട ശാസ്ത്രീയതയും ,അക്കാദമിക മാനദണ്‍ണ്ടങ്ങളും ആണ് ചർച്ചാ തന്തു .


2007 ലെ  പാഠ്യപദ്ധതി ചട്ടക്കൂട്  ലക്ഷ്യം നേടുന്നതിനു അനുയോജ്യമായ പഠന രീതികളല്ല സ്വീകരിച്ചിരിക്കുന്നത് ,പ്രശ്ന ബന്ധിതമായതിനാൽ പാഠപുസ്തക ഉള്ളടക്കത്തിന് നൈരന്തര്യമോ ,തുടര്ച്ചയോ ഇല്ല ,ദൈർഘ്യമേറിയ പഠന പ്രവർത്തനങ്ങൾ ,സ്വയം സമ്പൂർണ്ണമല്ലാത്ത പാഠപുസ്തകങ്ങൾ ,കലാപഠനം  ,കായിക വിദ്യാഭ്യാസം എന്നിവയ്ക്കുള്ള പ്രാധാന്യ കുറവ് , ഭാഷാ പഠനത്തിനു ആവശ്യമായ 

വ്യാകാരണാടിത്തറ കുറവ് ,അധ്യാപകരുടെ സ്വത്വപരമായ പ്രതിസന്ധി തുടങ്ങിയ ദോഷങ്ങളാണ് നിലവിലുള്ള  പാഠ്യപദ്ധതിയ്ക്ക് ഉള്ളതെന്നാണ് അസീസ്‌ കമ്മിറ്റി പഠന ഫലങ്ങൾ സൂചിപ്പിക്കുന്നത് .

Out come Based Learning എന്ന സമീപനമാണ് കേരള സ്‌കൂൾ പാഠ്യപദ്ധതി 2013 രൂപരേഖ വിഭാവനം ചെയ്യുന്നത് .പ്രമേയാധിഷ്ടിതമായ ഉദ്ഗ്രഥനമാണ് വേണ്ടതെന്നു രേഖ പറയുന്നു .അതുകൊണ്ട് തന്നെ ഏതെങ്കിലും ഒരു വിദ്യാഭ്യാസ ദർശനത്തിന് ഊന്നൽ നല്കാതെ ചേഷ്ട്ടാ വാദം ,ജ്ഞാന നിര്മ്മിതി വാദം എന്നിവ രണ്ടിനും പ്രത്യേകിച്ച് ഇടമുണ്ട് എന്ന് എടുത്തു പറയാതെ തന്നെ അവയ്ക്ക് കടന്നു വരാനുള്ള വിടവുകൾ ഒരുക്കിയിട്ടുണ്ട് പുതിയ രൂപരേഖയിൽ.ആദ്യ ഘട്ടമായി  ഈ രൂപരേഖ അനുസരിച്ചുള്ള പാഠപുസ്തകങ്ങൾ 1 ,3 ,5,7 ,11 ക്ലാസ്സുകളിലേക്കായി ഒരുങ്ങി കൊണ്ടിരിക്കുന്നു .


മാതൃഭാഷയ്ക്ക് കൂടുതൽ പ്രാധാന്യം എന്ന് പറയുന്നതോടൊപ്പം തന്നെ ,രക്ഷിതാക്കളുടെ നിരന്തരമായ അപേക്ഷ പ്രകാരം പ്രീ പ്രൈമറി  തലം തൊട്ടു തന്നെ സമാന്തരമായി ഇംഗ്ലീഷ് മീഡിയം ബാച്ചുകളും ,പാഠപുസ്തകങ്ങളും ശുപാർശ ചെയ്തിട്ടുണ്ട് .വിവര സാങ്കേതിക വിദ്യ ,വേറിട്ടല്ലാതെ എല്ലാ വിഷയങ്ങളിലൂടെയും പ്രാവർത്തികമാകും  വിധം ഉൾപ്പെടുത്താൻ ആണ് നിർദേശം .


കായിക -കലാ വിദ്യഭ്യാസം,ലൈംഗിക വിദ്യാഭ്യാസം,ദുരന്ത നിവാരണം,റോഡ്‌ സുരക്ഷ ,പ്രകൃതി സംരക്ഷണം ,ഭക്ഷ്യ സുരക്ഷാ നിയമ അവബോധം ..അങ്ങിനെ തുടങ്ങി പല മേഖലകളും പാഠ പുസ്തകങ്ങളിലേക്ക് നേരിട്ട് പഠനത്തിന്റെ ഭാഗമായി കടന്നു വരും എന്ന പ്രത്യേകതയും പുതിയ പാഠ്യപദ്ധതിയ്ക്കുണ്ട്.ഭാഷാ പഠനത്തിൽ ആശയ ഗ്രഹണം ,ആശയ പ്രകടനം എന്നിവയ്ക്ക് ഒപ്പം തന്നെ എഴുത്ത് ,വായന തുടങ്ങിയ ശേഷികൾക്കും കൂടുതൽ പരിഗണന നല്കണമെന്ന് രേഖയിൽ ശുപാർശയുണ്ട് .


അധ്യാപകൻ ഒരു മാതൃകയും ,വിദ്യാർത്ഥികളെ വാർത്തെടുക്കുന്നവനും,വിവിധ ബോധന രൂപങ്ങളെ ഉപയോഗിക്കുന്നവനും ,സ്വപ്നങ്ങൾ സൃഷ്ട്ടിക്കുന്നവനും ,നേതാവും ,സാഹസിക കൃത്യങ്ങൾ ഏറ്റെടുക്കുന്നവും ,സഹകരിക്കുന്നവനും ,പഠിതാവുമാകണമെന്നു റിപ്പോർട്ട് നിർദേശിക്കുന്നു .അദ്ധ്യാപകൻ വിദ്യാർത്ഥികളിൽ നിന്ന് പ്രതീക്ഷിക്കുന്ന ചേഷ്ടകൾ രൂപപ്പെടുത്തണം എന്നും റിപ്പോർട്ട് സൂചിപ്പിക്കുന്നു .   

അധ്യാപക ഗുണമേന്മ ഉറപ്പാക്കുന്ന ഉത്തരവാദിത്വത്തിൽ നിന്ന് ബി.ആർ .സി യെയും ,ഡയറ്റിനെയും ഒഴിവാക്കിയിട്ടുണ്ട് .അധ്യാപക പരിശീലനം ഇനി മുതൽ വിദ്യാലയാടിസ്ഥാനത്തിൽ ആയിരിക്കും എന്ന നിർദേശവും റിപ്പോർട്ടിൽ ഉണ്ട് .

പുതിയ പാഠ്യപദ്ധതി രൂപരേഖയിലെ പല നിർദേശങ്ങളും ,ശുപാർശകളും പ്രതീക്ഷയോടെ നോക്കി കാണേണ്ടത് തന്നെയാണ് .വിഭാവനം ചെയ്യപ്പെടുന്ന വിധം ഓരോ പാഠ്യപദ്ധതിയും കാലത്തോട് സംവദിക്കുന്നത്  ആ കാലത്തിന്റെ ആവശ്യങ്ങളെ മുൻ നിർത്തിയാവും എന്ന പ്രതീക്ഷയാണ് അതിൽ മുന്നിട്ടു നില്ക്കുന്നതും .


മുൻപ് സൂചിപ്പിച്ച പോലെ ഇതിനകം തന്നെ ചില വിമർശനങ്ങളും ഈ പാഠ്യപദ്ധതിയ്ക്കു നേരെയും ഉയർന്നിട്ടുണ്ട് .ചില അവ്യക്തതകൾ പലയിടത്തും നിഴലിക്കുന്നുണ്ട് എന്നതാണ് പ്രധാന ആരോപണം .ഒരു പാഠ്യപദ്ധതിയിൽ  സാധാരണ ഗതിയിൽ വിശദമാക്കാറുള്ള പഠന പ്രക്രിയകളുടെ സ്വഭാവം ,പഠനാന്തരീക്ഷം ,പഠിതാവിന്റെ ആവശ്യങ്ങൾ ,പഠന സാമഗ്രികൾ എന്നിവയുടെ സ്വഭാവം ഒന്നും ഇവിടെ വ്യക്തമാക്കിയിട്ടില്ല .ഏതു വിദ്യാഭ്യാസ ദർശനത്തിനാണ് ഊന്നൽ നല്കേണ്ടത് എന്നും പറഞ്ഞിട്ടില്ല .ആവശ്യമായ നിരീക്ഷണങ്ങളോ,ശാസ്ത്രീയമായ പഠനങ്ങളോ ഇല്ലാതെ ,കൂടുതൽ ചർച്ചകൾക്ക് സമയം നൽകാതെ തിടുക്കപ്പെട്ടു സമർപ്പിക്കപ്പെട്ട  രൂപരേഖ യഥാർത്ഥ പാഠ്യപദ്ധതി നിർമ്മാണത്തിന്റെ അന്തസത്ത ഉൾകൊള്ളുന്നതല്ല എന്ന ആരോപണം ശക്തമാണ് .കരിക്കുലം കമ്മിറ്റി നടത്തി എന്ന് പറയുന്ന സർവ്വേയുടെ ആധികാരികതയെ കുറിച്ചും സംശയങ്ങൾ ഉന്നയിക്കപ്പെടുന്നുണ്ട് .

സ്കൂളുകളും ,ക്ലാസ്സ്‌ മുറികളും പൊതുവായി നേരിട്ട് കൊണ്ടിരിക്കുന്ന അടിസ്ഥാന സൌകര്യങ്ങളുടെ കുറവുകൾ  ,കുട്ടികളുടെ എണ്ണം, പഠന ശേഷിയിൽ പിന്നിൽ നില്ക്കുന്ന കുട്ടികളുടെ ആവശ്യങ്ങൾ എന്നിവ അടക്കമുള്ള ചില പ്രശ്നങ്ങൾ പരിഹരിക്കപ്പെടാതെ പുതിയ ഒരു പാഠ്യപദ്ധതി നടപ്പിലായാലും എത്ര മാത്രം വിദ്യാഭ്യാസ പുരോഗതി നമ്മുക്ക് നേടാൻ കഴിയും എന്നത് ചിന്തനീയമാണ് .

മേൽ പറഞ്ഞ വിമർശനങ്ങൾ വസ്തു നിഷ്ഠമായി വിശകലനം നടത്തി  ശാസ്ത്ര സാഹിത്യ പരിഷത്ത് പ്രതിഷേധ ശബ്ദങ്ങളുടെ മുൻനിരയിൽ ഉണ്ട് .നടപ്പിൽ വരുമ്പോൾ മാത്രമേ ഇപ്പോൾ ഉയർന്നു കൊണ്ടിരിക്കുന്ന പല ചോദ്യങ്ങൾക്കും കൃത്യമായ ഉത്തരങ്ങൾ ലഭ്യമാകുകയുള്ളൂ .



 പാഠ്യപദ്ധതികൾ ആർക്കു വേണ്ടിയാണ് ?


ഓരോ പാഠ്യപദ്ധതിയും അക്കാദമികവും ,ഒപ്പം തന്നെ രാഷ്ട്രീയപരവുമായ ഒരു രേഖയാണ് .ആ വിധം നോക്കുമ്പോൾ ഓരോ പാഠ്യപദ്ധതി പരിഷ്ക്കരണങ്ങൾ വരുമ്പോഴും ,പോകുമ്പോഴും ബാക്കിയാകുന്ന ഒരു ചോദ്യമുണ്ട് .പാഠ്യപദ്ധതികൾ ആർക്കു വേണ്ടിയാണ് നിർമ്മിക്കപെടുന്നത് എന്ന ചോദ്യം .കേരളത്തിലെ മാറി മാറി വരുന്ന സർക്കാറുകളുടെ രാഷ്ട്രീയ അജണ്ടകൾക്ക് രംഗ പ്രവേശം ചെയ്യാനുള്ള 
ചട്ടക്കൂടുകളാണ് ഓരോ കരിക്കുലം കമ്മിറ്റിയിലും ഉടലെടുക്കുന്നത് എന്ന സംശയത്തിന്റെ സാധൂകരണത്തിന് നിദാനമായ തെളിവുകൾ അവശേഷിക്കുകയും ചെയ്യുന്നുണ്ട് എല്ലാ പാഠ്യപദ്ധതി പരിഷ്ക്കരണത്തിലും .അതൊട്ടും തന്നെ ആശാവഹമല്ല .കാലോചിതമായ മാറ്റങ്ങൾ വിദ്യാഭ്യാസ രംഗത്ത് അവശ്യം തന്നെ .ഏതു 
പാഠ്യപദ്ധതിയാണ്‌  ഭാവി വ്യക്തിത്വങ്ങളെ വാർത്തെടുക്കുന്നതിൽ ഏറ്റവും അനുയോജ്യമായിരിക്കുക എന്ന ആശങ്കൾക്കുത്തരം  ,അത് കൊണ്ട് തന്നെ ആപേക്ഷികമായിരിക്കും ,എല്ലാ കാലവും . 
Sunday, December 29, 2013
http://ottachilambu.blogspot.in

Tuesday, March 25, 2014

ആരാധന: വിശ്വാസ കച്ചവടത്തിലെ തുറുപ്പുചീട്ട്

ചവറു കണക്കിന് സഭകൾ!! കേരള കോണ്ഗ്രസ് പോലെ വളരും തോറും പിളരുകയും പിളരുംതോറും വളരുകയും ചെയ്യുന്നു!! ആനന്ദ ലബ്ധി ക്കിനിയെന്തു വേണം? എത്ര പിളർന്നാലും ,ഉപദേശ വ്യത്യാസമുണ്ടെങ്കിലും എല്ലാവരും ചേർന്ന് സഹകരിച്ചു തെറ്റിച്ചൊരു പ്രമാണമുണ്ട്:ആരാധനയുടെ.
പശ്ചാത്തലം:
പാപ്പയുടെ ഇടയലേഖനം കഴിഞ്ഞിട്ടേ ദൈവവചനമുള്ളൂ എന്നുറച്ച കത്തോലിക്കനും പെറ്റമ്മയെ മറന്നാലും അന്തോഖ്യയെ മറക്കില്ലെന്ന് മുദ്രാ വാക്യം വിളിക്കുന്ന ചാക്കോയും ദേവലോകത്തോട് കളിച്ചാൽ പരലോകം കാണിക്കുമെന്നു മനോരമ-മുത്തൂറ്റ് ബലത്തിൽ വീമ്പിളക്കുന്ന മെത്രാനും ഉപദേശ ശുദ്ധീകരണം സംബന്ധിച്ച് യാക്കോബായ വിട്ടിട്ട് ഇപ്പോൾ നേതാക്കന്മാർ സഹിതം സൊദൊമിലെക്കു യാത്ര ചെയുന്ന തോമ്മായും സഭ വളക്കൂറുള്ള ബിസിനസ് ആണെന്നു പിൽക്കാലത്ത് മനസ്സിലാക്കിയ സീയെസ്സൈയും നഷ്ടപ്പെട്ട മേൽവിലാസത്തിനായി ഉത്തരത്തിൽ തപ്പുന്ന ഇവാന്ജലിക്കലും കാതിലെയും കഴുത്തിലെയും ഊരി വച്ചാൽ ആകെ മൊത്തം വേർപാട് ആയെന്നും ഇനി കർത്താവു ഇങ്ങു വന്നാൽ മതിയെന്നും ഭൂഗോള നെറ്റ് വർക്കുള്ള ഞങ്ങൾ മുന്തിയ സഭക്കാർക്ക് വേണ്ടിയാണ് കർത്താവ് വരുന്നതെന്നും റാഡോ വാച്ചും ഐഫോണും റേഞ്ച് റോവറും മുപ്പതിനായിരം ചതുരശ്രയടി വീടും വേദ പുസ്തകതിലില്ലെന്നും ആശ്വസിക്കുന്ന പാരമ്പര്യ പെന്തിക്കോസ്തുകാരനും പുതിയ നിയമ പൌരോഹിത്യം ലങ്കക്കാരന്റെ ചേലയിലും ചട്ടയിലും ആണ് വെളിപ്പെടെണ്ടതെന്നു ഉറച്ചിരിക്കുന്ന സിലോണും നമ്മൾ ഒറ്റക്ക് മതിയെന്ന് പരസ്യമായി പറഞ്ഞിട്ട് രഹസ്യത്തിൽ ആത്മീയ റീ ട്ടൈൽ ചെയിൻ സ്വപ്നം കാണുന്നതും വേർപാട് വിശുദ്ധി ഉപദേശം തുടങ്ങിയ മേഖലകളിൽ അട്ടപ്പാടി നിലവാരം മാത്രമുള്ള ആലുക്കാസ് എന്നു ഗൾഫിൽ മറുപേരുള്ള ഇണ്ടിപ്പെണ്ടനും, ആത്മീയ നേതാവിനെ തമിഴൻ എന്ന പോലെ ആരാധിക്കുന്ന, കാശുള്ള സ്പോണ്സർമാരുടെ മാത്രം മികവിൽ മുമ്പോട്ട് പോകുന്ന സകല അസ്കിതകളും അറഞ്ഞു തുള്ളിയാൽ മാറുമെന്നു പഠിപ്പിക്കുന്ന കരിസ്മാറ്റിക്കുകാരനും അവിയൽ ആണ് ഏറ്റവും നല്ല കൂട്ടാൻ എന്ന് രുചിച്ചറിഞ്ഞ എക്കുമെനിക്കലുകാരനും മീറ്റിങ്ങിനിടയിൽ മൊട്ടു സൂചി തറയിൽ വീഴുന്നത് കേൾക്കാൻ കാതോർക്കുന്ന, ബോളിയുണ്ടാക്കുന്ന ചായക്കടക്കാരൻ ഏത്തപ്പഴത്തോട് ചെയ്യുന്ന പോലെ വാക്യങ്ങളെ പരമാവധി കീറുന്ന ബ്രതർകാരനും എല്ലാം കൂടി അങ്ങനെ ദൈവിക ഉദ്ദേശങ്ങളെ തെറ്റിച്ചു കളയുന്നതിൽ അകലം പാലിച്ചുകൊണ്ട് തന്നെ കൈകോർക്കുന്നു!! ആരാധിച്ചു ജയമെടുക്കുന്നു!! ബലം പ്രാപിക്കുന്നു!!

എന്തല്ല ആരാധന?
എല്ലാവരും ഒരുമിച്ചു കൂടി പാട്ടും പ്രാര്ത്ഥനയും മറ്റു കർമങ്ങളും ചെയ്യുന്നതിൻറെ പേര് വേദ പുസ്തകതിലെങ്ങും ആരാധനയെന്നു കൊടുത്തിട്ടില്ല.
അതിൻറെ പേര് സഭാ യോഗമെന്നാണ്, അല്ലെങ്കിൽ കൂട്ടായ്മ എന്നാണ്.
”ചിലർ ചെയ്യുന്നതുപോലെ നമ്മുടെ സഭായോഗങ്ങളെ ഉപേക്ഷിക്കാതെ തമ്മിൽ പ്രബോധിപ്പിച്ചു കൊണ്ടു സ്നേഹത്തിന്നും സൽപ്രവൃത്തികൾക്കും ഉത്സാഹം വർദ്ധിപ്പിപ്പാൻ അന്യോന്യം സൂക്ഷിച്ചുകൊൾക. നാൾ സമീപിക്കുന്നു എന്നു കാണുംതോറും അതു അധികമധികമായി ചെയ്യേണ്ടതാകുന്നു” (എബ്രായർ 10:24).
ഞായറാഴ്ച അഥവാ വെള്ളിയാഴ്ച നടക്കുന്നത് ഇമ്മിണി വലിയ സഭായോഗവും അല്ലാത്തതെല്ലാം ചെറു യോഗങ്ങളും എന്നില്ല (1 കൊരിന്തിയർ 14: 34 വായിക്കുക)
ദൈവമക്കൾ കൂടി വരുന്നതെല്ലാം ഒരേ പോലെ പ്രധാനമാണ്. യേശു വന്നിട്ടുണ്ടോ എന്നതാണ് വിശേഷ കാര്യം.
പക്ഷെ ദൗർഭഗ്യമെന്നു പറയട്ടെ, ദൈവ സഭക്കാർക്കു പോലും ഞായറാഴ്ച സഭായോഗമല്ല, “ആരാധനയാണ്”.
എപ്പോഴാണ് ആരാധനയെന്നു ചോദിച്ചാൽ മറുപടി ഉടൻ വരും: ”ഒമ്പത് തൊട്ടു പന്ത്രണ്ടര വരെ”
സിനിമാ നടനെയും സ്പോർട്സ് താരത്തെയും രാഷ്ട്രീയ നേതാവിനെയും ഒക്കെ ഒരുപാട് ആരാധിക്കുന്ന ആരും പക്ഷെ അവരുടെ മുൻപിൽ പോയി ആഴ്ചയിൽ രണ്ടു മണിക്കൂർ കസർത്ത് കാണിക്കാ ത്തതെന്താണ്? കാരണം അവർ ആരെ ആരാധിക്കുന്നുവോ ആ വ്യക്തിയെ എപ്പോഴും ഹൃദയത്തിൽ പേറുന്നു. എല്ലാറ്റിലും ഉപരി സ്നേഹിക്കുന്നു.ആ വ്യക്തിക്ക് വേണ്ടി വേണമെങ്കിൽ ജീവിതവും ജീവനും വെടിയാൻ തയ്യാറാണ്. അതെ, ഇതാണ് ശരിയായ ആരാധന.
ചുരുക്കിപ്പറഞ്ഞാൽ വെറും മൃഗ തുല്യനായ ജ ഡിക മനുഷ്യനാണ് ആരാധന എന്ന വാക്കിൻറെ അർഥം അറിഞ്ഞു ജീവിക്കുന്നവർ. അവരിൽ നിന്ന് ഇനിയെങ്കിലും സഭക്കാർ പഠിക്കട്ടെ.
ഇതും പോരാഞ്ഞിട്ട് സ്വർഗം കുനിഞ്ഞു നോക്കുന്ന, ആകാശം ചായ്ചിറങ്ങി വരുന്ന, അഗ്നിയഭിഷേകം അയക്കുന്ന വെറൈറ്റികൾ വേറെയും.
ഇന്നത്തെ ദുരവസ്ഥ:
കൂട്ടായ്മയിൽ കൂടുതൽ ചാടി കൂടുതൽ ശബ്ദത്തിൽ കാറിയാൽ കൂടുതൽ അനുഗ്രഹവും രോഗശാന്തിയും കിട്ടുമെന്ന കരിസ്മാറ്റിക്കുകാരൻറെ തന്ത്രത്തിന് അടിമ വേല ചെയ്യുന്ന ദാസന്മാർ അനേകർ ദൈവ സഭകളിലുണ്ട്.
കാരണം ദാവീദു പണ്ട് പെട്ടകത്തിന് മുൻപിൽ തുള്ളിയത്രേ . ജഡത്തിന്റെ പ്രവർത്തി യാലല്ല വിശ്വാസത്താലാണ് നീതികരണമെന്നും ഇനി ദൈവത്തെ പ്രസാദിപ്പിക്കാൻ ജഡത്തിന്റെ ഒരു പ്രവർത്തിയും ശേഷിക്കുന്നില്ലെന്നും ഇനിയും അറിയാത്ത പുതിയ നിയമത്തിന്റെ അടിസ്ഥാനം പോലുമറിയാത്ത മക്കുണന്മാർ ചാടിക്കുമ്പോഴൊക്കെക്കെ കുരങ്ങു കളിക്കുന്ന അയ്യോ പാവങ്ങൾ!!
രോഗ, കടഭാര, വന്ധ്യത വിഷയങ്ങൾ നന്നായി ആരാധിച്ചാൽ മാറുമെന്നു പറഞ്ഞു പറ്റിച്ചു ശാപത്തിന്റെ ശുശ്രൂഷ ചെയ്യുന്നവരെ ദൈവം തന്നെ കൈകാര്യം ചെയ്യട്ടെ. ”കരങ്ങളടിക്കൂ …ഉറക്കെ സ്തുതിക്കൂ”…ഇതെല്ലാം ”ആരാധനയെ” അനുഗ്രഹ മാക്കുമത്രെ. ശമുവേൽ പ്രവാചകൻറെ അമ്മ ഹന്നയെപ്പോലെ ആരെങ്കിലും അനങ്ങാതെ നിന്ന് ദൈവസന്നിധിയിൽ നിന്ന് കൊണ്ട് ഹൃദയം പകരുന്നത് കണ്ടാൽ ഇവർ കൊന്നു നിലവിളിക്കും. ഇവരുടെ തത്വമനുസരിച്ച് നന്നായി ”ആരാധിക്കാത്തത്” കൊണ്ട് ഈ ജന്മത്തിൽ മാത്രമല്ല അടുത്ത ജന്മത്തിലും ഹന്ന പ്രസവിക്കില്ല!!
ചുരുക്കം വാക്കുകൾ പ്രാർഥിച്ചു സ്വർഗത്തിൽ നിന്ന് തീയിറക്കുമാറാക്കിയ എലിയാവിനെക്കാൾ ഇവരുടെ ഇഷ്ട താരം ഉറഞ്ഞു തുള്ളി മിറക്കിൾബോയ് ആയ അവരുടെ ദൈവത്തെ ഇറക്കാൻ ശ്രമിച്ച ബാലിൻറെ പ്രവാചകന്മാരാനണത്രെ.
എല്ലാം അടക്കി ഒറ്റയ്ക്ക് ഭരിക്കുന്ന അൽഫയും ഒമേഗയുമായ ശുശ്രൂഷകന്റെ റോൾ പഴയ നിയമ പുരോഹിതന്റെതിൽ നിന്ന് എങ്ങനെ വ്യത്യസ്തമായിരിക്കുന്നെന്നു ചോദിച്ചാൽ വേണമെങ്കിൽ നിന്നാൽ മതി അല്ലാത്തവനൊക്കെ പോകാം എന്ന ഉഗ്രശാസനയാണ് ഫലം.
കർതൃമേശക്കു തൊട്ടു മുൻപ് ഇൻസ്റ്റന്റ് മാനസാന്തരം പഠിപ്പി ക്കുന്ന ഇക്കൂട്ടരിൽ നിന്ന് ഇത്രയും പ്രതീക്ഷിച്ചാൽ മതി .
ആഴ്ചയിൽ ആറെമുക്കാൽ ദിവസവും എന്തു തോന്ന്യാസം കാണിച്ചു ജീവിച്ചാലും ഏഴാമത്തെ ദിവസം ഇവിടെ വന്നു ചവിട്ടിപ്പൊളിച്ചാൽ എല്ലാം ഓക്കെ ആകുമെന്ന് ഉളുപ്പില്ലാതെ കത്തിച്ചു വിടുമ്പോൾ ദൈവത്തിൻറെ ക്ഷമ കെടുന്നു: ”നിങ്ങൾ എന്റെ യാഗപീഠത്തിന്മേൽ വെറുതെ തീ കത്തിക്കാതിരിക്കേണ്ടതിന്നു നിങ്ങളിൽ ആരെങ്കിലും വാതിൽ അടെച്ചുകളഞ്ഞാൽ കൊള്ളായിരുന്നു; എനിക്കു നിങ്ങളിൽ പ്രസാദമില്ല എന്നു സൈന്യങ്ങളുടെ യഹോവ അരുളിച്ചെയ്യുന്നു; നിങ്ങളുടെ കയ്യിൽ നിന്നു ഞാൻ വഴിപാടു കൈക്കൊൾകയുമില്ല” മലാഖി 1:10
ഇവർ പറയുന്ന വേറൊരു ന്യായം ദൈവം ചെയ്ത ഉപകാരങ്ങൾ ഓർത്തു ദൈവ സന്നിധിയിൽ സന്തോഷിക്കുന്നതാണത്രെ ഈ കാട്ടിക്കൂട്ടുന്നതെല്ലാം. എത്ര പ്രയാസപ്പെട്ടു ഈ സന്തോഷമെല്ലാം മനസ്സിൽ അടക്കിപ്പിടിച്ചു വെച്ചിട്ട് ആഴ്ചയിൽ ഒരു ദിവസം പെട്ടെന്ന് പുറത്തേക്കു വിടാൻ പ്രത്യേക സിദ്ധി തന്നെ വേണം!! ഇനി സന്തോഷം വരാത്തവരെ പിരി കേറ്റിയും സന്തോഷിപ്പിക്കും.
”ഞാനുമെന്റെ കുടുബവുമോ …ഞങ്ങളെ ദൈവം സേവിക്കും” എന്നതാണ് ഇവരുടെ പ്രമാണം.
പുതിയ നിയമ സഭയിൽ സങ്കീർത്തന ധ്യാനം ആകാം പക്ഷെ നിർബന്ധം ആക്കിയത് ആരാണ്, എന്നാണ് എന്നൊക്കെ ചോദിച്ചാൽ ബുദ്ധിയില്ലാത്തവന്റെ ഒരു മാതിരി ‘’ആക്കുന്ന’’ ചോദ്യമായി മാത്രമെയുടുക്കൂ.
ആരാധിച്ചു വിടുതലെടുക്കുന്നവരും ബലപ്പെടുന്നവരും വേറെയൊരു കൂട്ടം!! പൌലോസും ശിലാസും ആരാധിച്ചത് കണ്ടു ഇഷ്ടപ്പെട്ടിട്ടാണ് ദൈവം അവരുടെ കെട്ടു പൊട്ടിച്ചതത്രേ. കൂർക്കം വലിച്ചുറങ്ങിക്കിടന്ന പത്രോസിനെ വിടുവിച്ചു പുറത്തു കൊണ്ട് വന്നത് കൂർക്കം വലി ദൈവത്തിനു വളരെ ഇഷ്ടപ്പെട്ടിട്ടാണെന്ന് പ്രസംഗിച്ചാൽ അതിനും സ്തോത്രം പറയാൻ കീ ബോർഡിന്റെയും തമ്പേ റി ന്റെയും ആത്മാവിനനുസരിച്ചു നടത്ത പ്പെടുന്ന പടു ജന്മങ്ങൾ ഇഷ്ടം പോലെ!!
ഇതിൻറെയൊന്നും പേരല്ല ആരാധനയെങ്കിൽ പിന്നെന്താണ് ആരാധന?
കർത്താവിന്റെ വരവു വൈകിയാൽ അതടുത്ത ആഴ്ച ചർച്ച ചെയ്യാം.
http://www.spiritualauditing.com

ഷിനോജേക്കബ് കൂറ്റനാട് .

സേവന മനസ്ഥിതിയെയാണ് എക്കാലത്തും
നമ്മുടെ നാട്ടിലെ മഹാത്മാക്കള്‍ ഈശ്വരഭക്തിയുടെ
ഏറ്റവും ഉയര്‍ന്ന പ്രകടനമായി ഉയര്ത്തിപ്പിടിച്ചിട്ടുള്ളത്.
" ഞാന്‍ രാജ്യമോ സ്വര്‍ഗമോ ആഗ്രഹിക്കുന്നില്ല. എല്ലാ
ജീവജാലങ്ങളുടെയും ദുഖങ്ങളും ദുരിതങ്ങളും
ദുരീകരിക്കാനാണ് എനിക്കാഗ്രഹം."എന്നതായിരുന്നു
നമ്മുടെ പൂര്‍വ്വികരുടെ പ്രാര്‍ത്ഥന.അതാണ് യഥാര്‍ത്ഥ 
സേവനത്തിന്റെ അന്തസ്സത്ത.ഇങ്ങനെയുള്ള ഒരാളുടെ 
നിരന്തര പ്രാര്‍ത്ഥന "സേവനത്തിനായി കൂടുതല്‍ 
ശക്തിയും കഴിവും തരണേ"എന്നായിരിക്കും.
അയാളുടെ ജീവിത സാഫല്യം തനിക്കു ദൈവം 
തന്നിട്ടുള്ളതെല്ലാം താന്‍ സേവനത്തിനായി
സമര്‍പ്പിച്ചു എന്നതിലായിരിക്കും.
-
ഗുരുജി ഗോള്‍വര്‍ക്കര്‍-

കിം ജ്യോതിസ്തവ ഭാനുമാനഹനിമേ
രാത്രൌപ്രദീപാദികം
സ്യാദേവം രവിദീപദര്‍ശന വിധൌ
കിം ജ്യോതിരാഖ്യാഹിമേ
ചക്ഷുസ്തസ്യനിമീലനാദിസമയേ
കിം ധീര്‍ധിയോദര്‍ശനേ
കിം തത്രാഹമതോഭവാന്‍പരമകം
ജ്യോതിസ്തദസ്മിപ്രഭോ
നിനക്ക് എന്താണു വെളിച്ചം?എനിക്കു പകല്‍
സൂര്യനാണു വെളിച്ചം; രാത്രിയില്‍ ദീപം തുടങ്ങിയവ. 
അതിരിക്കട്ടെ,സൂര്യനെയും ദീപത്തെയും കാണുന്ന
കാര്യത്തില്‍ വെളിച്ചമെന്താണ്?എന്നോടു പറയൂ. 
അതിനു കണ്ണാണു വെളിച്ചം. അതടച്ചു കഴിഞ്ഞാല്‍
പിന്നെയെന്താണു വെളിച്ചം?ബുദ്ധിയാണു വെളിച്ചം.
 ബുദ്ധിയെ കാണുന്ന കാര്യത്തില്‍ എന്താണു വെളിച്ചം?
 അക്കാര്യത്തില്‍ ഞാന്‍ തന്നെയാണു വെളിച്ചം. 
അതുകൊണ്ടു നീയാണ് വെളിച്ചങ്ങളുടെയൊക്കെ
അങ്ങേയറ്റത്തെ വെളിച്ചം.



പരിത്രാണായ സാധൂനാം
വിനാശായ ച ദുഷ്‌കൃ താം
ധര്‍മസംസ്ഥാപനാര്‍ത്ഥായ
സംഭവാമി യുഗേ യുഗേ 

( പ്രകൃത്യനുസാരമായതിനെയൊക്കെ
സംരക്ഷിക്കുന്നതിനും അതിനു വിപരീതമായതിനെ
 നശിപ്പിക്കാനും അങ്ങനെ ധര്‍മത്തെ
പുനഃസ്ഥാപിക്കാനുമായി കാലാകാലങ്ങളില്‍
ഞാന്‍ അവതരിക്കുന്നു.)
ഭഗവത്ഗീത

പ്രകൃതിയുടെ മേല്‍ നമ്മള്‍,മനുഷ്യര്‍ നേടിയ
വിജയങ്ങളെച്ചൊല്ലി അതിര്‍കവിഞ്ഞ ആത്മപ്രശംസ
നടത്തേണ്ടതില്ല . അത്തരം ഓരോ വിജയത്തിനും
പ്രകൃതി നമ്മോട് പകവീട്ടുന്നുണ്ട്.ഓരോ വിജയവും
 ആദ്യകാലത്ത് നമ്മള്‍ ഉദ്ദ്യേശിച്ച
 ഫലങ്ങളാണുളവാക്കുന്നതെന്നത് ശരിതന്നെ.
 എന്നാല്‍ രണ്ടാമതും മൂന്നാമതുമായി അതുളവാക്കുന്നത്
 തികച്ചും വ്യത്യസ്തവും അപ്രതീക്ഷിതവും പലപ്പോഴും
 ആദ്യത്തെ നേട്ടത്തെ പിന്‍തള്ളുന്നതുമായ ഫലങ്ങളാണ്.
ഏംഗല്‍സ് - പ്രകൃതിയുടെ വൈരുദ്ധ്യാത്മകത

 ശക്തമായ തിരമാലകളില്‍ കടല്‍ത്തീരത്തടിഞ്ഞ്
പിടഞ്ഞുകൊണ്ടിരുന്ന കുഞ്ഞുമീനുകളെയെടുത്ത്
കടലിലേക്ക് തിരിച്ചെറിഞ്ഞ് അവയുടെ ജീവന്‍
രക്ഷിച്ചുകൊണ്ടിരുന്ന കൊച്ചുകുട്ടിയെ കണ്ടപ്പോള്‍
പരിഷ്കാരിയായിരുന്ന ആ മനുഷ്യന്‍ ആശ്ചര്യം പൂണ്ടു
 . അയാള്‍ ആ കൊച്ചുകുട്ടിക്കരികിലേക്ക് ചെന്ന് ചോദിച്ചു
 നോക്കൂ.... ഈ തീരത്ത് എത്രയോ മത്സ്യക്കുഞ്ഞുങ്ങള്‍
തിര മാലയില്‍പ്പെട്ട് കരക്കടിഞ്ഞ് ചത്തുകൊണ്ടിരിക്കുന്നു
........ നിനക്കിങ്ങനെ പെറുക്കിയെടുത്താല്‍ അതില്‍ എത്ര
 മത്സ്യക്കുഞ്ഞുങ്ങളെ രക്ഷിക്കാന്‍ കഴിയും .... അയാളുടെ
ചോദ്യം വിമര്‍ശനാത്മകമായിരുന്നു . കുട്ടി അയാളുടെ
മുഖത്തേക്ക് നോക്കി , ഒരു നിമിഷത്തെ മൌനത്തിനു
ശേഷം ഒരു മീന്‍ കുഞ്ഞിനെ പെറുക്കിയെടുത്ത്
കടലിലേക്കെറിഞ്ഞുകൊണ്ടവന്‍ പറഞ്ഞു , എനിക്ക്
ഈ മീന്‍ കുഞ്ഞിനെ രക്ഷിക്കാനാവും......... ഞാന്‍
ആ കൊച്ചുകുട്ടിയുടെ കാലടികളെ പിന്തുടരാന്‍ ഇഷ്ടപ്പെടുന്നു
 .... ഷിനോജേക്കബ് കൂറ്റനാട് .



"പൊതുജനാഭിപ്രായത്തിന്റെഒഴുക്കിനനുകൂലമായി
 ഒഴുകികൊണ്ട്
വളരെ വേഗം പ്രശസ്തി നേടാന്‍ കഴിയും. പക്ഷെ
, സ്വന്തം വകതിരിവിനനുസരിച്ച,
പൊതുജനാഭിപ്രായത്തിനു വിപരീതമായി
ശബ്ദമുയര്‍ത്താന്‍മുതിരുന്നയാളാണ്
 യഥാര്‍ത്ഥനേതാവ്.നിലവില്‍
അംഗീകാരമില്ലാത്തവയാണെങ്കില്‍ പോലും, 
സ്വന്തം
അഭിപ്രായം അയാള്‍ ആരെയും കൂസാതെ പറയും.
പരിതസ്ഥിതികള്‍ക്കനുസരിച്ചു
വഴങ്ങികൊടുക്കാന്‍ കൂട്ടാക്കാതെ അയാള്‍ 
പരിതസ്ഥിതികളെതന്നെ
മാറ്റിമറിക്കും. ശരിയായ നേതൃത്വത്തിന്റെ മാറ്റ് അറിയുക
,ജനാഭിപ്രായം രൂപപ്പെടുത്തുന്നതിലാണ്,അല്ലാതെ 
അതിന്റെ പിന്നാലെ പോകുന്നതിലല്ല."
ഡോക്ടര്‍ ഹെഡ്ഗേവാര്‍ -


ഓം സഹനാവവതു
സഹനൗ ഭൂനക്തു
സഹവീര്യം കരവാവഹൈ
തേജസ്വിനാവധീതമസ്തു
മാവിദ്വിഷാവഹൈ
ഓം ശാന്തി ശാന്തി ശാന്തി

( ദൈവം നമ്മെ രക്ഷിക്കട്ടെ
നമുക്ക്‌ എല്ലാം ഭക്ഷണം നല്‍കട്ടെ
നമ്മള്‍ ഉന്മേഷത്തോടെയും വീര്യത്തോടെയും
ഒരുമിച്ച്‌ പ്രവര്‍ത്തികള്‍ ചെയ്യട്ടെ
നമ്മുടെ പഠനം,
പ്രയോജനകരവും ശക്തവുമാകട്ടെ
നമ്മള്‍ കലഹിക്കാതിരിക്കട്ടെ
എന്നില്‍ ശാന്തി ഉണ്ടാകട്ടെ
എല്ലായിടത്തും ശാന്തി ഉണ്ടാകട്ടെ )

ഷിനോജേക്കബ് കൂറ്റനാട് .